ബലിപെരുന്നാൾ: മാംസവിതരണ കാമ്പയിനുമായി റെഡ്​ ക്രെസൻറ്​

കുവൈത്ത്​ സിറ്റി: ബലിപെരുന്നാളിനോടനുബന്ധിച്ച്​ മാംസ വിതരണത്തിന്​ കുവൈത്ത്​ റെഡ്​ ക്രെസൻറ്​ സൊസൈറ്റി കാമ്പയിൻ ആരംഭിച്ചു. 
കുവൈത്തിലെ സാമ്പത്തിക ശേഷിയില്ലാത്തവർക്ക്​ മാംസം വിതരണം ചെയ്യാനാണ്​ സംഭാവന സ്വീകരിച്ചുതുടങ്ങിയതെന്ന്​ റെഡ്​ ക്രെസൻറ്​ സൊസൈറ്റി സെക്രട്ടറി ജനറൽ മഹ അൽ ബർജസ്​ പറഞ്ഞു.

ജൂലൈ 31നാണ്​ ബലി പെരുന്നാൾ പ്രതീക്ഷിക്കുന്നത്. കോവിഡ്​ പ്രതിസന്ധി നിരവധിപേരുടെ തൊഴിലിനെയും വരുമാനത്തെയും ബാധിച്ചതിനാൽ ഇത്തവണ സേവനപ്രവർത്തനങ്ങളുടെ പ്രസക്തി വർധിച്ചെന്ന്​ അവർ പറഞ്ഞു. സംഭാവന നൽകാൻ ആഗ്രഹിക്കുന്നവർക്ക്​ കുവൈത്ത്​ റെഡ്​ ക്രെസൻറ്​ സൊസൈറ്റിയുടെ വെബ്​സൈറ്റ്​ സന്ദർശിക്കുകയോ ശുവൈഖിലെ സംഘടനയുടെ ആസ്ഥാനത്ത്​ എത്തുകയോ ചെയ്യാമെന്ന്​ അവർ പറഞ്ഞു.