പൊതുമാപ്പ്​ ക്യാമ്പിലെ പ്രതിഷേധം:മൂന്ന്​ ഇൗജിപ്​തുകാർ അറസ്​റ്റിൽ

കുവൈത്ത്​ സിറ്റി: പൊതുമാപ്പിന്​ രജിസ്​റ്റർ ചെയ്​ത്​ ക്യാമ്പിൽ പ്രതിഷേധം നടത്തിയ മൂന്ന്​ ഇൗജിപ്​തുകാർ അറസ്​റ്റിലായി. രണ്ടാമത്​ തവണയാണ്​ പൊതുമാപ്പ്​ ക്യാമ്പിൽ ഇൗജിപ്​തുകാർ ബഹളം വെക്കുന്നത്​. കഴിഞ്ഞയാഴ്​ചയുണ്ടായ സംഭവത്തിലും ഏതാനും പേർ അറസ്​റ്റിലായിരുന്നു. രണ്ടുതവണയും സൈന്യമിറങ്ങിയാണ്​ സ്ഥിതി ശാന്തമാക്കിയത്​. നേരത്തെ കുവൈത്ത്​ ആഭ്യന്തരമന്ത്രി അനസ്​ അൽ സാലിഹ്​ ഇൗജിപ്​ത്​ അംബാസഡറെ വിളിച്ചുവരുത്തി പ്രതിഷേധം അറിയിക്കുകയും മുന്നറിയിപ്പ്​ നൽകുകയും ചെയ്​തിരുന്നു. 

കുവൈത്തി​​െൻറ പരമാധികാരത്തിനും സുരക്ഷക്കും നേരെയുള്ള വെല്ലുവിളിയായാണ്​ ഇത്തരം സംഭവങ്ങളെ കാണുന്നതെന്നും ഇത്​ അനുവദിക്കില്ലെന്നും ആഭ്യന്തരമന്ത്രി വ്യക്​തമാക്കിയിരുന്നു. തങ്ങളെ നാട്ടിൽ കൊണ്ടുപോവാൻ വൈകുന്നതിൽ പ്രതിഷേധിച്ചവർ ഇൗജിപ്​ത്​ ഭരണകൂടത്തിനെതിരെയാണ്​ മുദ്രാവാക്യം മുഴക്കിയത്​. എന്നാൽ, കുവൈത്തിൽ നിയമപ്രകാരം വിദേശികൾക്ക്​ സമരത്തിന്​ അനുമതിയില്ല.