നമുക്കും വേണ്ടേ പ്രത്യേക വിമാനം...

കുവൈത്ത്​ സിറ്റി: കുവൈത്ത്​ അന്താരാഷ്​ട്ര വിമാനത്താവളത്തിൽ യാത്രാവിമാനങ്ങൾ സർവിസ്​ നിർത്തിയതോടെ രാജ്യത്ത്​ കുടുങ്ങിക്കിടക്കുന്നവർ നിരവധി. വിസ കാലാവധി കഴിഞ്ഞവരും പ്രായമായവരും നാട്ടിൽ അത്യാവശ്യ കാര്യങ്ങൾ ഉള്ളവരും എല്ലാം ഇക്കൂട്ടത്തിൽ ഉൾപ്പെടുന്നു.

വിസ കാലാവധി കഴിയുന്നവർക്ക്​ കുവൈത്ത്​ നിയമനടപടി ഒഴിവാക്കിക്കൊടുത്തിട്ടുണ്ട്​. യാത്രാ വിമാനങ്ങൾ നിർത്തിയ ശേഷവും രണ്ടു വിമാനങ്ങൾ കുവൈത്തിൽനിന്ന്​ പറന്നു. ലെബനോൻ, ഈജിപ്​ത്​ എന്നിവിടങ്ങളിലേക്കാണ്​ ഈ രാജ്യങ്ങളുടെ എംബസിയുടെ പ്രത്യേക ഇടപെടൽ വഴി ഓരോ വിമാനങ്ങൾ അയക്കാൻ വഴിയൊരുക്കിയത്​.

ബുധനാഴ്​ച കുവൈത്ത് അന്താരാഷ്​ട്ര വിമാനത്താവളത്തില്‍നിന്ന്​ 298 ഈജിപ്ഷ്യന്‍ യാത്രക്കാരുമായി ഈജിപ്ത് എയര്‍ വിമാനം കെയ്‌റോവിലേക്കു പറന്നു. ഇതില്‍ 96 യാത്രക്കാര്‍ നാടുകടത്തുന്നവരാണ്.

രണ്ടുദിവസം മുമ്പ്​ ലെബനോൻ യാത്രക്കാരുമായി മിഡിൽ ഈസ്​റ്റ്​ എയർ വിമാനവും പറന്നുയർന്നിരുന്നു.

ഇന്ത്യക്കാരായ നിരവധി പേർ ഇത്തരത്തിൽ അടിയന്തരമായി നാട്ടിൽ പോവാൻ ആഗ്രഹിക്കുന്നവരായും ആവശ്യക്കാരായും ഉണ്ട്​. ഇന്ത്യൻ എംബസി ഇടപെട്ട്​ പ്രത്യേക വിമാനം ഏർപ്പെടുത്തണമെന്ന്​ പ്രവാസി ഇന്ത്യക്കാരിൽനിന്ന്​ ആവശ്യം ഉയർന്നിട്ടുണ്ട്​.