ഡോക്​ടർമാരുടെ കൂട്ടരാജി: വ്യാജവാർത്തയെന്ന്​ ആരോഗ്യ മന്ത്രാലയം

കുവൈത്ത്​ സിറ്റി: കുവൈത്തിൽ ഡോക്​ടർമാർ കൂട്ടത്തോടെ രാജിവെക്കുന്നതായി പ്രചരിച്ച വാർത്ത സത്യ​മല്ലെന്ന്​ ആരോഗ്യ മന്ത്രാലയം വ്യക്​തമാക്കി.

കോവിഡിനെതിരായ പോരാട്ടത്തിൽ മാതൃകാപരമായ പ്രവർത്തനമാണ്​ ഡോക്​ടർമാർ ഉൾപ്പെടെ ആരോഗ്യ പ്രവർത്തകർ നടത്തുന്നത്​.

അവരുടെ കഠിനാധ്വാനത്തിന്​ രാജ്യം കടപ്പെട്ടിരിക്കുന്നു.

ആരോഗ്യ ജീവനക്കാരുടെ സുരക്ഷക്ക്​ സർക്കാർ പ്രതിജ്​ഞാബദ്ധമാണെന്നും അധികൃതർ വ്യക്​തമാക്കി. രോഗികളുടെയും ബന്ധുക്കളുടെയും ഭാഗത്തുനിന്ന്​ അതിക്രമങ്ങൾ വർധിച്ച കാരണം ഡോക്​ടർമാർ കൂട്ടത്തോടെ രാജിവെക്കുകയാണെന്നാണ്​ സമൂഹ മാധ്യമങ്ങളിൽ പ്രചരിച്ചത്​.

തെറ്റായ വാർത്തകൾ പ്രചരിപ്പിച്ചവർക്കെതിരെ നിയമനടപടി സ്വീകരിക്കുമെന്നും ഇത്തരം വാർത്തകൾ സ്വീകരിക്കരുതെന്നും ആധികാരിക വാർത്ത ഉറവിടങ്ങളെ മാത്രം ആശ്രയിക്കണമെന്നും അധികൃതർ അഭ്യർഥിച്ചു.