തെരഞ്ഞെടുപ്പ്​ പ്രചാരണം പരിധിവിട്ടാൽ കർഫ്യൂ ഏർപ്പെടുത്തും

കുവൈത്ത്​ സിറ്റി: പാർലമെൻറ്​ തെരഞ്ഞെടുപ്പ്​ പ്രചാരണ ഭാഗമായി സെമിനാറുകളും ഒത്തുചേരലുകളും സജീവമായാൽ കുവൈത്ത്​ സർക്കാർ കർശന നടപടി സ്വീകരിച്ചേക്കും. നിയന്ത്രണാതീതമായ സ്ഥിതിയുണ്ടായാൽ ഭാഗിക കർഫ്യൂ ഏർപ്പെടുത്താൻ വരെ മടിക്കില്ലെന്ന്​ സർക്കാർ വൃത്തങ്ങൾ മുന്നറിയിപ്പ്​ നൽകി. വരുംദിവസങ്ങളിലെ കോവിഡ്​ വ്യാപനവും തെരഞ്ഞെടുപ്പ്​ പ്രവർത്തനങ്ങളുടെ ദിശയും വിലയിരുത്തിയാണ്​ ഇക്കാര്യത്തിൽ തീരുമാനമെടുക്കുക. ഒത്തുചേരലുകൾക്കെതിരായ മുന്നറിയിപ്പിൽ തെരഞ്ഞെടുപ്പ്​ പ്രചാരണത്തിന്​ ഒരു ഇളവും നൽകേണ്ടെന്നാണ്​ തീരുമാനം. സാധാരണ സ്ഥാനാർഥികൾ തമ്പ്​ കെട്ടി പ്രചാരണം നടത്താറുണ്ട്​.

ഒരു മാസ​ക്കാലം തെരഞ്ഞെടുപ്പ്​ പ്രചാരണ തമ്പുകൾ ഭക്ഷണവും ചർച്ചയുമായി സജീവമാവാറുണ്ട്​. ഇത്തവണ തമ്പിന്​ അനുമതിയില്ല. കോവിഡ്​ ​പശ്ചാത്തലത്തിൽ ഇത്തവണ ആഭ്യന്തര മന്ത്രാലയവും ആരോഗ്യ മന്ത്രാലയം സംയുക്​തമായാണ്​ തെരഞ്ഞെടുപ്പ്​ പ്രവർത്തനങ്ങൾക്ക്​ നേതൃത്വം നൽകുന്നത്​. വോ​​െട്ടടുപ്പ്​ കേന്ദ്രത്തിലെല്ലാം താൽക്കാലിക ക്ലിനിക്​ സ്ഥാപിക്കും. താപനില രേഖപ്പെടുത്തിയും ആവശ്യമെങ്കിൽ കോവിഡ്​ പരിശോധന നടത്തിയുമാണ്​ അകത്തേക്ക്​ പ്രവേശിപ്പിക്കുക. സാമൂഹിക അകലം പാലിക്കുന്നുവെന്ന്​ ഉറപ്പുവരുത്തുന്ന രീതിയിലാവും ക്രമീകരണം. പ്രായമേറിയവരുടെയും ക്വാറൻറീനിലുള്ളവരുടെയും വോട്ടിങ്​ സംബന്ധിച്ച്​ തെരഞ്ഞെടുപ്പ്​ കമ്മിറ്റി യോഗം ചേർന്ന്​ തീരുമാനിക്കും. അസാധാരണ സാഹചര്യത്തിലൂടെ ലോകം കടന്നുപോവുന്നതിനാൽ വോ​െട്ടടുപ്പിലും അസാധാരണത്വം പ്രകടമാവും.