കുവൈത്തിൽ പെരുന്നാൾ ദിനം മുതൽ കർഫ്യൂ ഇല്ല

കുവൈത്ത്​ സിറ്റി: കുവൈത്തിൽ പെരുന്നാൾദിനം മുതൽ കർഫ്യൂ ഉണ്ടാകില്ല. പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹി​െൻറ അധ്യക്ഷതയിൽ ചേർന്ന മന്ത്രിസഭ യോഗമാണ്​ ഭാഗിക കർഫ്യൂ പിൻവലിക്കാൻ തീരുമാനിച്ചത്​. രാത്രി ഏഴുമുതൽ പുലർച്ചെ അഞ്ചുവരെയാണ്​ നിലവിൽ കർഫ്യൂ. അതേസമയം, പെരുന്നാൾ ദിനം മുതൽ കർഫ്യൂ അവസാനിപ്പിക്കുമെങ്കിലും വ്യാപാര നിയന്ത്രണങ്ങൾ ഉണ്ടാകും.

രാത്രി എട്ടുമുതൽ പുലർച്ചെ അഞ്ചുവരെയാണ്​ വ്യാപാര സ്ഥാപനങ്ങൾ അടച്ചിടേണ്ടത്​. റസ്​റ്റാറൻറുകൾ, കഫെകൾ, അറ്റകുറ്റപണി സേവനങ്ങൾ, ഫാർമസികൾ, ഫുഡ്​ മാർക്കറ്റിങ്​ ഒൗട്ട്​ലെറ്റുകൾ, പാരലൽ മാർക്കറ്റ്​, മെഡിക്കൽ ആൻഡ്​ സപ്ലൈസ്​ എന്നിവക്ക്​ വിലക്ക്​ ബാധകമല്ല. റസ്​റ്റാറൻറുകളും കഫെകളും ടേക്​ എവേ/ഡെലിവറി സേവനങ്ങൾ തുടരണം. സ്ഥാപനത്തിൽ ഇരുന്ന്​ കഴിക്കുന്ന രീതി മറ്റൊരറിയിപ്പുണ്ടാകുന്നത്​ വരെ പാടില്ല. പെരുന്നാൾ കച്ചവടം നഷ്​ടപ്പെട്ടതി​െൻറയും വ്യാപാര നിയന്ത്രണങ്ങൾ ഭാഗികമായി തുടരുന്നതി​െൻറയും നിരാശയുണ്ടെങ്കിലും നിയന്ത്രണങ്ങൾ നീക്കി പതിയെ സാധാരണ നിലയിലേക്ക്​ വരുന്നതി​െൻറ ആശ്വാസമാണ്​ വ്യാപാരി സമൂഹം ഉൾപ്പെടെയുള്ളവർക്ക്​. മാർച്ച്​ എട്ടുമുതൽക്കാണ്​ ഭാഗിക കർഫ്യൂ ആരംഭിച്ചത്​.

കർഫ്യൂ നടപ്പാക്കണമെന്ന നിർദേശം നേരത്തെ തന്നെ സർക്കാറിന്​ മുന്നിൽ ഉണ്ടായിരുന്നെങ്കിലും വിപണിയിലെ ആഘാതവും ജനങ്ങൾക്കുണ്ടാകുന്ന ബുദ്ധിമുട്ടുകളും കണക്കിലെടുത്താണ്​ നീട്ടിവെച്ചത്​. എന്നാൽ, കോവിഡ്​ വ്യാപനം പിടിവിടുകയും ആശുപത്രികൾ നിറഞ്ഞുവരികയും ചെയ്യുന്നതോടെ സർക്കാർ കർശന നിലപാടിലേക്ക്​ മാറി. വാക്​സിനേഷനിൽ ശ്രദ്ധേയമായ പുരോഗതിയുണ്ടായതും പുതിയ കേസുകളും തീവ്രപരിചരണ വിഭാഗത്തിലുള്ളവരുടെ എണ്ണവും കുറഞ്ഞതും ആശ്വാസ നടപടിക്ക്​ അധികൃതരെ പ്രേരിപ്പിച്ചു.