കോവിഡ്​19 പ്രതിരോധ ഫണ്ടിലേക്ക്​ സഹായമൊഴുകുന്നു

കുവൈത്ത്​ സിറ്റി: കോവിഡ്​ 19 പ്രതിരോധ ഫണ്ടിലേക്ക്​ വ്യവസായികളിൽനിന്നും കമ്പനികളിൽനിന്നും സഹായം ഒഴുകുന്നു. മുഹമ്മദ് അബ്​ദുറഹ്​മാന്‍ അല്‍ ബഹര്‍ കമ്പനി 20 ലക്ഷം ദീനാർ, അബ്​ദുല്ല ഹമദ് സകര്‍ ആൻഡ്​ ബ്രദേഴ്‌സ് കമ്പനി പത്ത്​ ലക്ഷം ദീനാർ, ചേംബർ ഓഫ് കോമേഴ്‌സ് 20 ലക്ഷം ദീനാർ, അബ്​ദുല്‍ അസീസ് സഊദ് അല്‍ ബാബ്തൈന്‍ 5 ലക്ഷം ദീനാർ, അബ്​ദുല്ല അല്‍ കൻദരി 10 ലക്ഷം ദീനാർ നാസിര്‍ വ ബദര്‍ മുഹമ്മദ് അല്‍ അരീഷ് 150,000 ഡോളർ, അബ്​ദുല്ല ഹമദ് സകര്‍ ആൻഡ്​ ബ്രദേഴ്‌സ് കമ്പനി പത്ത്​ ലക്ഷം ദീനാർ, ഫവാസ് ഖാലിദ് യൂസുഫ് അല്‍ മര്‍സൂഖ് ഒരുകോടി ഡോളർ എന്നിങ്ങനെ സംഭാവന നൽകി.

കുവൈത്ത് ബാങ്ക്​ ഒരു കോടി ദീനാറി​​െൻറ സഹായ ഫണ്ട് രൂപവത്​കരിച്ചിട്ടുണ്ട്. പണത്തിന്​ പുറമെ സാധന സാമഗ്രികളും സംഭാവനയായി ഒഴുകുന്നുണ്ട്​. ചില കമ്പനികള്‍ സാമഗ്രികള്‍ എത്തിക്കുന്നതി​​െൻറ ചെലവുകളും ഏറ്റെടുത്തിട്ടുണ്ട്.

അലി മുഹമ്മദ് ഷനിയാന്‍ അല്‍ഗാനിം 500,000 പരിശോധന ഉപകരണങ്ങള്‍ നല്‍കി. അബ്​ദുല്ല അല്‍ ഷാഹീന്‍ മുന്ന് ലോഡ് അണുനാശിനി സാമഗ്രികൾ, ബയോ ​െഎസൊലേറ്റര്‍ ഉപകരണങ്ങള്‍, വൈറസ്​ വ്യാപനം തടയാനായി ഉപയോഗിക്കുന്ന വസ്ത്രങ്ങള്‍ എന്നിവയാണ് നല്‍കിയത്.

ഈജിപ്തില്‍നിന്ന്​ കുവൈത്തിലെത്തിയ സ്വദേശി വിദ്യാർഥികള്‍ക്കും നിലവില്‍ ഈജിപ്തിലുള്ള സ്വദേശി വിദ്യാർഥികള്‍ക്കും താമസിക്കാന്‍ ഹോളിഡേ ഹോട്ടലിലെ മുഴുവന്‍ ചെലവകളും ജവാദ് ബൂഹംസീന്‍ ഏറ്റെടുത്തു. വിദേശത്തുള്ള സ്വദേശികളെ രാജ്യത്തെത്തിക്കാനും ഭക്ഷണപദാർഥങ്ങള്‍, മെഡിക്കല്‍ ഉപകരണങ്ങള്‍ തുടങ്ങിയവ എത്തിക്കാൻ ജസീറ എയര്‍വേയ്​സ് സന്നദ്ധമായിട്ടുണ്ട്.

മുഴുവന്‍ ലോജിസ്​റ്റിക്​ കാര്യങ്ങളും അജിലിറ്റി ഏറ്റെടുത്തു. ത്വയ്യിബ ആശുപത്രി, അലോര്‍ഫ് ആശുപത്രി എന്നിവ ചികിത്സ ഉപകരണങ്ങളും മരുന്നുകളും നല്‍കി.