രോഗമുക്​തരുടെ എണ്ണം കൂടുന്നു; കുവൈത്ത്​ കോവിഡിനെ കീഴടക്കുന്നുവോ​?

കുവൈത്ത്​ സിറ്റി: കുവൈത്തിൽ കോവിഡ്​ സ്ഥിരീകരിച്ച ശേഷം രോഗമുക്​തി നേടുന്നവരുടെ എണ്ണം കൂടിവരുന്നത്​ ആശ്വാസ മാവുന്നു. ചൊവ്വാഴ്​ച പുതുതായി രോഗം സ്ഥിരീകരിച്ചവരേക്കാൾ അധികമായി രോഗമുക്​തർ. 164 പേർ രോഗമുക്​തി നേടിയപ്പേ ാൾ 152 പേർക്ക്​ മാത്രമാണ്​ പുതുതായി വൈറസ്​ ബാധ സ്ഥിരീകരിച്ചത്​. ആകെ 1176 പേർ രോഗമുക്​തി നേടി.

2241 പേരാണ്​ ചികിത്സയിലുള്ളത്​. 67 പേർ തീവ്രപരിചരണ വിഭാഗത്തിലുണ്ടെങ്കിലും ഇതിൽ 37 പേർക്ക്​ ഗുരുതരാവസ്ഥയില്ല. വൈറസി​​െൻറ സാമൂഹിക വ്യാപനത്തി​​െൻറ രണ്ടാംഘട്ടത്തിൽ തുടരുകയാണ്​ രാജ്യം. നിയന്ത്രണാതീതമാവുന്നതും അപകടകരവുമായ മൂന്നാം ഘട്ടത്തിലേക്ക്​ കടക്കാതെ പിടിച്ചുനിർത്താൻ കുവൈത്തിന്​ കഴിഞ്ഞിട്ടുണ്ടെന്നാണ്​ പുതിയ കണക്കുകൾ സൂചിപ്പിക്കുന്നത്​.

അതോടൊപ്പം രോഗമുക്​തരുടെ എണ്ണത്തിൽ ഗണ്യമായ വർധനയുമുണ്ട്​. കഴിഞ്ഞ അഞ്ച്​ ദിവസത്തിനിടെ 678 പേർ രോഗമുക്​തി നേടി. വരും ദിവസങ്ങളിലും ഇതേ നില തുടരുകയാണെങ്കിൽ കോവിഡ്​ പ്രതിരോധത്തിനായി ഏർപ്പെടുത്തിയ നിയന്ത്രണങ്ങൾ ലഘൂകരിക്കാനും സാധ്യതയുണ്ട്​. കർശനമായ നിയന്ത്രണങ്ങൾക്കൊപ്പം സ്വയം നിയന്ത്രണത്തി​​െൻറ മാനസിക നില സമൂഹത്തിൽ സജീവമായത്​ വൈറസിനെ വരുതിയിലാക്കുന്നതിൽ സഹായകമാവുന്നുണ്ട്​. എന്നാലും, ഒരു വിഭാഗം ഇപ്പോഴും പൊതുഇടങ്ങളിൽ കൂടിക്കലരുന്നുണ്ട്​.