പൊതുമാപ്പ്​: യാത്രാചെലവ്​ കുവൈത്ത്​ സർക്കാർ വഹിക്കും

കുവൈത്ത്​ സിറ്റി: അനധികൃത താമസക്കാർക്ക്​ നൽകുന്ന പൊതുമാപ്പ്​ ഉപയോഗപ്പെടുത്തി തിരിച്ചുപോവുന്ന വിദേശികളു ടെ യാത്രാചെലവ്​ കുവൈത്ത്​ സർക്കാർ വഹിക്കും. അനധികൃതമായി താമസിച്ചതി​​​െൻറ പിഴ പൂർണമായി ഒഴിവാക്കിയാണ്​ ഏപ്രിൽ ഒന്നുമുതൽ 30 വരെ തിരിച്ചുപോവാൻ അനുമതി നൽകിയിട്ടുള്ളത്​.

നിയമാനുസൃതം വീണ്ടും കുവൈത്തിലേക്ക്​ തിരിച്ചുവരു ന്നതിനും തടസമില്ല. നടപടികൾ പൂർത്തിയാക്കിയതുമുതൽ യാത്ര ദിവസം വരെ താമസിപ്പിക്കാൻ അധികൃതർ സംവിധാനം ഒരുക്കുന്നുണ്ട്​. താമസ നിയമലംഘകരായ ഇന്ത്യക്കാർ ഏപ്രിൽ 11 മുതൽ ഏപ്രിൽ 15 വരെ തീയതികളിലാണ് തിരിച്ചുപോക്കിനുള്ള നടപടികൾ പൂർത്തിയാക്കേണ്ടത്.

പുരുഷന്മാർ അൽ മുത്തന്ന ബോയ്സ് സ്‌കൂളിലും (ഫർവാനിയ, ബ്ലോക്ക് 1, സ്ട്രീറ്റ് 122), സ്ത്രീകൾ ഫർവാനിയ ഗേൾസ് സ്‌കൂളിലും (ഫർവാനിയ ബ്ലോക്ക് 1 സ്ട്രീറ്റ് 76) ആണ് ഹാജരാകേണ്ടത്. രാവിലെ എട്ടു മുതൽ ഉച്ചക്ക് രണ്ടു മണി വരെയാണ് പ്രവർത്തന സമയം.

ഏപ്രിൽ ഒന്നുമുതൽ അഞ്ചുവരെ ഫിലിപ്പീൻസുകാർ, ഏപ്രിൽ ആറുമുതൽ 10 വരെ ഇൗജിപ്​തുകാർ, 11 മുതൽ 15 വരെ ഇന്ത്യക്കാർ, 16 മുതൽ 20 വരെ ബംഗ്ലാദേശികൾ, 21 മുതൽ 25 വരെ ശ്രീലങ്കക്കാർ, 26 മുതൽ 30 വരെ മറ്റു രാജ്യക്കാർ എന്ന രീതിയിലാണ്​ നടപടിക്രമങ്ങൾക്ക്​ തീയതി നിശ്ചയിച്ചിട്ടുള്ളത്​.

യാത്രാവിലക്കോ കോടതി വ്യവഹാരങ്ങളോ ഉള്ളവർക്ക് താമസകാര്യ ജനറൽ അഡ്​മിനിസ്​ട്രേഷനെ സമീപിച്ച്​ കേസിൽ പുനഃപരിശോധന ആവശ്യപ്പെട്ട്​ പരിഹാരം കണ്ടതിന്​ ശേഷമേ പൊതുമാപ്പ്​ പ്രയോജനപ്പെടുത്താനാവൂ.

കുവൈത്ത് പൗരന്മാരുടെ വിദേശി ഭാര്യമാർ, കുവൈത്ത് പൗരന്മാരുടെ വിദേശികളായ മാതാപിതാക്കൾ, കുവൈത്തി വനിതകളുടെ വിദേശി ഭർത്താക്കമാരും അവരുടെ മക്കളും, കുവൈത്തികളിൽനിന്ന്​ വിവാഹമോചനം നേടുകയോ വിധവയാവുകയോ ചെയ്ത എന്നാൽ തങ്ങളുടെ സംരക്ഷണത്തിൽ കഴിയുന്ന മക്കളുള്ള വിദേശവനിതകൾ, ഗാർഹിക തൊഴിലാളികൾ, 2020 മാർച്ച് ഒന്നിന്​ ശേഷം താമസനിയമം ലംഘിച്ചവർ എന്നിവർക്ക്​ പിഴ അടച്ച്​ താമസരേഖ ശരിയാക്കി ഇവിടെ തുടരാൻ അനുമതി നൽകുന്നുണ്ട്.

നിശ്ചിത സമയത്തിനുള്ളിൽ ഇളവ് പ്രയോജനപ്പെടുത്താത്ത താമസനിയമ ലംഘകർക്കെതിരെ കർശന നടപടികൾ ഉണ്ടാകും.