കോവിഡ്​ പ്രതിരോധം: മുന്നണിപ്പോരാളികൾക്ക്​ സാമ്പത്തിക സഹായം നൽകാൻ നീക്കം

കുവൈത്ത്​ സിറ്റി: കുവൈത്തിൽ കോവിഡ്​ പ്രതിരോധത്തിലെ മുന്നണിപ്പോരാളികളായ ആരോഗ്യ പ്രവർത്തകർ ഉൾപ്പെടെയുള്ളവർക്ക്​ പ്രത്യേക സാമ്പത്തിക സഹായം നൽകാൻ നീക്കം. കോവിഡ്​ പ്രതിരോധത്തിന്​ സ്വന്തം ജീവിതംപോലും അവഗണിച്ച്​ മുൻനിരയിലുണ്ടായിരുന്നവർക്ക്​ അർഹിക്കുന്ന ആദരവ്​ നൽകണമെന്ന അമീർ ശൈഖ്​ സബാഹ്​ അൽ അഹ്​മദ്​ അൽ ജാബിർ അസ്സബാഹി​​െൻറ നിർദേശത്തി​​െൻറ ചുവടുപിടിച്ചാണ്​ സാമ്പത്തിക സഹായം ഉൾപ്പെടെ നൽകാൻ സർക്കാർ നീക്കം ആരംഭിച്ചത്​. ജീവനക്കാരെ മൂന്നു വിഭാഗങ്ങളായി തിരിച്ചാണ്​ സാമ്പത്തിക സഹായം നൽകുക. കോവിഡ്​ രോഗികളുമായി നേരിട്ട്​ സമ്പർക്കം പുലർത്തുന്ന ആരോഗ്യ മന്ത്രാലയത്തിലെയും ആ​ഭ്യന്തര മന്ത്രാലയത്തിലെയും ജീവനക്കാരാണ്​ ഒന്നാം വിഭാഗത്തിൽ. 

സംശയ സാഹചര്യത്തിലുള്ളവരുമായി ഇടപെടേണ്ടിവരുന്ന സർക്കാർ വകുപ്പുകളിലെ ജീവനക്കാരാണ്​ രണ്ടാം വിഭാഗത്തിൽ. ക്ലിനിക്കുകളിലെയും അതിർത്തി ചെക്ക്​​പോസ്​റ്റുകളിലെയും ക്വാറൻറീൻ സ​െൻററുകളിലെയും ജീവനക്കാർ ഇൗ വിഭാഗത്തിൽപെടുന്നു. കർഫ്യൂ സമയത്ത്​ ജോലി ചെയ്യേണ്ടിവരുന്ന മറ്റുള്ളവരാണ്​ മൂന്നാം വിഭാഗത്തിൽ. മൂന്നു വിഭാഗത്തിനും വ്യത്യസ്​ത രീതിയിലാവും സാമ്പത്തിക സഹായം. വൈറസ്​ ബാധിച്ച്​ മരിച്ചവരെ രക്​തസാക്ഷികളായി പരിഗണിക്കുന്നതും സേവനത്തിനിടെ വൈറസ്​ ബാധിതരാവുന്നവർക്ക്​ രോഗമുക്​തി നേടുന്നതുവരെ പ്രത്യേക അലവൻസ്​ നൽകുന്നതും ആലോചനയിലുണ്ട്​.