വിമാനത്താവളത്തിൽ ദിവസവും 500 പേർക്ക്​ കോവിഡ്​ പരിശോധന

കുവൈത്ത്​ സിറ്റി: കുവൈത്ത്​ അന്താരാഷ്​ട്ര വിമാനത്താവളത്തിൽ ആഗസ്​റ്റ്​ ഒന്നുമുതൽ കമേഴ്​സ്യൽ വിമാന സർവിസ്​ ആരംഭിക്കു​േമ്പാൾ ദിവസവും 500 പേർക്ക്​ കോവിഡ്​ പരിശോധന നടത്തും. കുവൈത്തിലേക്ക്​ വരുന്ന യാത്രക്കാരിൽനിന്ന്​ റാൻഡം അടിസ്ഥാനത്തിലായിരിക്കും പരിശോധന. വിവിധ രാജ്യങ്ങളിൽനിന്ന്​ വരുന്നവർ രണ്ടാഴ്​ച വീട്ടുനിരീക്ഷണത്തിൽ കഴിയേണ്ടിവരുമെന്നും അധികൃതർ വ്യക്​തമാക്കി. വീട്ടുനിരീക്ഷണ കാലത്ത്​ പുറത്തിറങ്ങുന്നില്ലെന്ന്​ ഉറപ്പാക്കാൻ ഇലക്​ട്രോണിക്​ വള അണിയിക്കും. ഇത്​ മുഴുവൻ സമയവും അണിയണം. ഇൗ വള അണിഞ്ഞവരുടെ സഞ്ചാരഗതി ആഭ്യന്തര മന്ത്രാലയ ആസ്ഥാനത്തിരുന്ന്​ അറിയാൻ കഴിയും. മൊബൈൽ ഫോണിൽ ‘ശ്ലോനിക്​’ എന്ന ആപ്ലിക്കേഷൻ ഡൗൺലോഡ്​ ചെയ്യണം. ഇതും ആളുകളുടെ സഞ്ചാരഗതി അറിയാൻ സഹായിക്കുന്നതാണ്​.

വീട്ടുനിരീക്ഷണ കാലത്ത്​ പുറത്തിറങ്ങുന്നവരെ നിർബന്ധിത ഇൻസ്​റ്റിറ്റ്യൂഷനൽ ക്വാറൻറീന്​ വിധേയരാക്കും. ഇൻസ്​റ്റിറ്റ്യൂഷനൽ ക്വാറൻറീൻ കാലം കഴിഞ്ഞാൽ നിയമനടപടി സ്വീകരിക്കുമെന്നും ആരോഗ്യമന്ത്രാലയം വ്യക്​തമാക്കി. ആഗസ്​റ്റിൽ വിമാനത്താവളത്തിൽ സർവിസ്​ ആരംഭിക്കുമെങ്കിലും ആദ്യഘട്ടത്തിൽ രാത്രി 10നും പുലർച്ച നാലിനുമിടെ കമേഴ്​സ്യൽ വിമാനങ്ങൾ ഉണ്ടാവില്ല. ഇതനുസരിച്ച്​ വിമാനങ്ങളുടെ സമയക്രമം പുനഃക്രമീകരിക്കാൻ വ്യോമയാന വകുപ്പ്​ വിമാനക്കമ്പനികളോട്​ ആവശ്യപ്പെട്ടിട്ടുണ്ട്​. മൂന്നുഘട്ടത്തിലായാണ്​ ​കമേഴ്​സ്യൽ വിമാന സർവിസ്​ ആരംഭിക്കുന്നത്​. ആഗസ്​റ്റ്​ ഒന്നുമുതൽ ആരംഭിക്കുന്ന ആദ്യഘട്ടത്തിൽ പ്രതിദിനം 10,000 യാത്രക്കാർക്കാണ്​ സേവനം ഉപയോഗപ്പെടുത്താനാവുക. 30 ശതമാനം ജീവനക്കാരാണ്​ ​ജോലിയിലുണ്ടാവുക. പ്രതിദിനം 100 വിമാന സർവിസുകളാണ്​ പരമാവധി ഉണ്ടാവുക.