ബ്രിട്ടീഷ് പൗരന്മാര്‍ക്ക്​ സകാത്ത് ഹൗസില്‍നിന്ന്​ സഹായമെന്ന്​ വ്യാജ വാർത്ത

കുവൈത്ത് സിറ്റി: കുവൈത്തിലുള്ള ബ്രിട്ടീഷ് പൗരന്മാര്‍ക്ക്​ സകാത്ത് ഹൗസില്‍നിന്ന്​ സഹായം തേടാമെന്ന തരത്തില്‍ പ്രചരിച്ച വാര്‍ത്ത ബൈത്തുസകാത്ത് അധികൃതർ നിഷേധിച്ചു.

ബ്രിട്ടീഷ് എംബസിയുമായി ഒരു ഏകോപനവും ബൈത്തുസകാത്ത് നടത്തിയിട്ടില്ലെന്നും എന്തെങ്കിലും ഇടപാട്​ ഉണ്ടാവുകയാണെങ്കിൽഅത്​ വിദേശകാര്യമന്ത്രാലയവുമായി ബന്ധപ്പെട്ടായിരിക്കുമെന്നും അധികൃതർ അറിയിച്ചു.

നിലവിലെ സാഹചര്യത്തില്‍ ബൈത്തുസകാത്ത് ഒരു കേസും സ്വീകരിക്കുന്നില്ലെന്നും മന്ത്രിസഭയുടെ തീരുമാനപ്രകാരം ജീവനക്കാര്‍ അവധിയിലാണെന്നും ബൈത്തുസകാത്ത് ഉറവിടങ്ങള്‍ സൂചിപ്പിച്ചു. മാത്രമല്ല,
നിലവില്‍ രജിസ്​റ്റര്‍ ചെയ്ത മാര്‍ച്ച് മാസത്തെ സംഭാവന ധനമന്ത്രാലയമാണ് നല്‍കുന്നതെന്നും അധികൃതര്‍ അല്‍ റായി ദിനപത്രത്തോട്​ പറഞ്ഞു.