നിർദേശം ലംഘിച്ച്​ പള്ളികളുടെ പുറത്ത്​ സംഘടിത നമസ്​കാരം

കുവൈത്ത്​ സിറ്റി: കൊറോണ വ്യാപനം തടയാൻ സർക്കാർ പുറപ്പെടുവിച്ച വിലക്ക്​ ലംഘിച്ച്​ പലയിടത്തും പള്ളിമുറ്റത്ത്​ സംഘടിത നമസ്​കാരം. ജുമുഅ, ജമാഅത്ത് (സംഘടിത) നമസ്​കാരങ്ങൾ അനിശ്ചിത കാലത്തേക്ക് നിർത്തിവെക്കാനും പളികൾ അടച്ചിടാനും കുവൈത്ത്​ മതകാര്യ മന്ത്രാലയം മാർച്ച്​ 13നാണ്​ ഉത്തരവ്​ പുറപ്പെടുവിച്ചത്​. വീടുകളിൽ നമസ്​കരിക്കണമെന്നും പ്രവാചക വചനത്തി​​െൻറ അടിസ്ഥാനത്തിലാണ് ഇത്തരമൊരു നിർദേശം പുറപ്പെടുവിച്ചതെന്നും മതകാര്യ മന്ത്രാലയം വ്യക്തമാക്കിയിരുന്നു.

ബുഖാരി, മുസ്​ലിം തുടങ്ങിയ പ്രമുഖർ റിപ്പോർട്ട് ചെയ്ത പ്രവാചക വചനങ്ങൾ മുൻനിർത്തിയാണ് ഈ നിർദേശം പുറപ്പെടുവിക്കുന്നതെന്നും ഫത്‌വയിൽ വ്യക്തമാക്കിയതാണ്​. എന്നാൽ, ഇത്​ ഗൗരവത്തിലെടുക്കാതെയാണ്​ മസ്​ജിദുകളുടെ മുറ്റത്ത്​ തുണി വിരിച്ച്​ സംഘടിത നമസ്​കാരം നടത്തുന്നത്​. മാസ്​കും കൈയുറയും പോലെയുള്ള വൈറസ്​ പ്രതിരോധ മുൻകരുതൽ ഒന്നും സ്വീകരിക്കാതെയാണ്​ ഇടകലരൽ. പൊലീസ്​ ഇടപെട്ട്​ ആളുകളെ ഒഴിപ്പിക്കുന്നുവെങ്കിലും പലയിടത്തും സംഘടിത നമസ്​കാരം നിർബാധം തുടരുന്നു.

വൈറസ്​ ബാധയുള്ള ഒരാൾ ഇക്കൂട്ടത്തിലുണ്ടാവുകയും മറ്റുള്ളവരിലേക്ക്​ പകരാൻ ഇടവരുകയും ചെയ്​താൽ കാര്യങ്ങൾ കൈവിട്ടുപോവും. കൊറോണ വൈറസിനെ പടികടത്താൻ വിവിധ മന്ത്രാലയങ്ങൾ കഠിനാധ്വാനം ചെയ്യു​േമ്പാളാണ്​ ഒരുവിഭാഗം നിർദേശങ്ങൾക്ക്​ വിലകൽപ്പിക്കാതെ തന്നിഷ്​ടം കാണിക്കുന്നത്​. രോഗവ്യാപനത്തിന്​ കാരണമാവു​മെന്ന്​ ഭയക്കുന്ന സാഹചര്യത്തിൽ പള്ളിയിൽ വരുന്നത്​ ഒഴിവാക്കി വീട്ടിൽ നമസ്​കരിക്കുക തന്നെയാണ്​ ചെയ്യേണ്ടതെന്നാണ്​ ഇസ്​ലാമിക പണ്ഡിതന്മാർ വ്യക്​തമാക്കുന്നത്​. തന്നെയുമല്ല, വിലക്ക്​ ലംഘിച്ച്​ പള്ളിമുറ്റത്ത്​ സംഘടിത നമസ്​കാരത്തിനെത്തുന്നത്​ നിയമലംഘനമാണെന്നും പിടികൂടി നാടുകടത്താൻ മടിക്കില്ലെന്നുമാണ്​ പൊലീസ്​ വ്യക്​തമാക്കുന്നത്​.