കുവൈത്ത്​: കോവിഡിനെതിരെ കരുതൽ വോട്ട്​

കുവൈത്ത്​ സിറ്റി: കോവിഡ്​ പശ്ചാത്തലത്തിൽ കുവൈത്ത്​ പാർലമെൻറ്​ തെരഞ്ഞെടുപ്പ്​ നടന്നത്​ കനത്ത ജാഗ്രതയിൽ. സാമൂഹിക അകലം ഉറപ്പുവരുത്തുന്ന രീതിയിലായിരുന്നു ക്രമീകരണം. ഒരു മീറ്റർ അകലത്തിൽ കസേരയിട്ടായിരുന്നു കാത്തിരിപ്പ്​. മാസ്​കും കൈയുറയും ധരിച്ചാണ്​ വോട്ടർമാർ എത്തിയത്​. പ്രവേശന കവാടത്തിൽ സാനിറ്റൈസറുമായി ഉദ്യോഗസ്ഥർ നിലയുറപ്പിച്ചിരുന്നു.

ശരീര താപനില പരിശോധിച്ചാണ്​ അകത്തേക്ക്​ കടത്തിവിട്ടത്​. സംശയമുള്ളവർക്ക്​ കോവിഡ്​ പരിശോധന നടത്തി. ഇതിനായി എല്ലാ പോളിങ്​ സ്​റ്റേഷനുകളോടും അനുബന്ധിച്ച്​ ക്ലിനിക്ക്​ സ്ഥാപിച്ചു. സ്​പർശന സാധ്യതയുള്ള പ്രതലങ്ങളെല്ലാം ഇടക്കിടെ അണുവിമുക്​തമാക്കിക്കൊണ്ടിരുന്നു. കോവിഡ്​ ബാധിതർക്കായി എല്ലാ ഗവർണറേറ്റിലും ഒ​ാരോ ബൂത്ത്​ പ്രത്യേകം ക്രമീകരിച്ചു. ഇവിടെ ആരോഗ്യ സുരക്ഷ ഉറപ്പുവരുത്താൻ അധിക ജാഗ്രതയുണ്ടായിരുന്നു.