തൊഴിൽ പെർമിറ്റ് ഫീസ് അഞ്ചിരട്ടി വരെ വർധിപ്പിക്കാൻ നീക്കം

കുവൈത്ത്​ സിറ്റി: കുവൈത്തിൽ തൊഴിൽ പെർമിറ്റ്​ ഫീസ്​ വർധന സംബന്ധിച്ച്​ പഠിക്കാൻ സമിതിയെ നിശ്ചയിക്കും. കഴിഞ്ഞ ദിവസം ചേർന്ന മാൻപവർ പബ്ലിക്​ ​അതോറിറ്റി ഡയറക്​ടർ ബോർഡ്​ യോഗത്തിലാണ്​ തീരുമാനം. എല്ലാ വിഭാഗം​ തൊഴിൽ പെർമിറ്റ്​ പുതുക്കുന്നതിനും ഫീസ്​ വർധിപ്പിക്കും. അഞ്ചിരട്ടി വരെ നിരക്ക്​ വർധിപ്പിക്കാനാണ്​ ആലോചന. ഇതുസംബന്ധിച്ച്​ പഠിക്കാൻ മന്ത്രിസഭ മാൻപവർ പബ്ലിക്​ അതോറിറ്റിയെ ചുമതലപ്പെടുത്തിയിരുന്നു. മാൻപവർ അതോറിറ്റി വിശദമായ പഠനത്തിന്​ സമിതിയെ നിശ്ചയിക്കാൻ തീരുമാനിച്ചു.

വിസക്കച്ചവടവും അവിദഗ്​ധ തൊഴിലാളികളുടെ ആധിക്യവും തടയാൻ വർക്ക്​ പെർമിറ്റ്​ സംവിധാനം പൊളിച്ചെഴുതുന്നത്​ സംബന്ധിച്ചും പഠനം നടത്തും. 2022 അവസാന പാദത്തിലാണ്​ നിർദേശം നടപ്പാക്കാൻ ലക്ഷ്യമിടുന്നത്​. ഒാരോ തൊഴിൽ മേഖലയിലും ​സ്വദേശികൾക്കും വിദേശികൾക്കും അനുപാതം നിശ്ചയിക്കാൻ പദ്ധതിയുണ്ട്​.