കുവൈത്തിൽനിന്ന്​ ചാർ​ട്ടേഡ്​ വിമാനങ്ങൾ നാളെ മുതൽ

കുവൈത്ത്​ സിറ്റി: കുവൈത്തിൽനിന്ന്​ ചാർട്ടർ വിമാനങ്ങൾ ബുധനാഴ്​ച മുതൽ സർവിസ്​ നടത്തും. വിവിധ ട്രാവൽസുകൾ സ്വന്തം നിലക്കും പ്രവാസി സംഘടനകളുമായി സഹകരിച്ചും സർവിസ്​ നടത്തുന്നു. ജസീറ എയർവേ​സും പ്രത്യേക വിമാനങ്ങൾ അയക്കുന്നുണ്ട്​. വന്ദേ ഭാരത്​ മിഷനേക്കാൾ ടിക്കറ്റ്​ നിരക്ക്​ കൂടുതലാണെങ്കിലും ചാർ​േട്ടഡ്​ വിമാനങ്ങളിൽ അധികതുക നൽകി പോകാൻ ധാരാളംപേർ തയാറായിട്ടുണ്ട്​. 80 ദീനാറാണ്​ വന്ദേ ഭാരത്​ മിഷനിലെ ടിക്കറ്റ്​ നിരക്ക്​. എന്നാൽ, ചാർട്ടർ വിമാനങ്ങൾക്ക്​ 115 ദീനാർ മുതൽ 135 ദീനാർവരെ ഇൗടാക്കുന്നു. വന്ദേ ഭാരതി​​െൻറ നാലാംഘട്ടത്തിൽ കുവൈത്തിൽനിന്ന്​ ഇന്ത്യയിലേക്ക്​ 12 വിമാനങ്ങളാണുള്ളത്​. കേരളത്തിലേക്ക്​ മൂന്ന്​ വിമാനമുണ്ട്​. ആദ്യ മൂന്ന്​ ഘട്ടങ്ങളിലായി കേരളത്തിലേക്ക്​ 10​ വിമാനവും ഇന്ത്യയിലേക്കാകെ 21 വിമാനവുമാണ്​ ഉണ്ടായിരുന്നത്​. 

ഇൗ നിലയിൽ ഷെഡ്യൂൾ ചെയ്​താൽ അത്യാവശ്യക്കാർക്കുപോലും നാട്ടിലെത്താൻ മാസങ്ങളെടുക്കും. ഇൗ സാഹചര്യത്തിൽ ടിക്കറ്റ്​ നിരക്ക്​ ടുതലാണെങ്കിലും ചാർട്ടർ വിമാനങ്ങൾ അനുഗ്രഹമാണ്​. ജോലിയും വരുമാനവുമില്ലാതെ ഇവിടെ ദിവസങ്ങൾ തള്ളിനീക്കുക​ പ്രയാസമാണ്​. അതുകൊണ്ടാണ്​ അധികനിരക്ക്​ നൽകി നാടണയാൻ​ ആളുകൾ തയാറാവുന്നത്​. പ്രതിദിന വാണിജ്യ വിമാനങ്ങൾ വൈകാതെ ആരംഭിക്കുമെന്ന സൂചനയും പുറത്തുവന്നിട്ടുണ്ട്​. 
മൂന്നു​ ഘട്ടങ്ങളിലായി കമേഴ്​സ്യൽ വിമാന സർവിസ്​ ആരംഭിക്കാൻ തയാറെടുക്കുന്നതായി കുവൈത്ത്​ സേവനകാര്യ, പാർലമ​െൻററികാര്യ മന്ത്രി മുബാറക് അൽ ഹാരിസ് കഴിഞ്ഞദിവസം പറഞ്ഞു. ഒന്നാംഘട്ടത്തിൽ 30 ശതമാനം, രണ്ടാംഘട്ടത്തിൽ 60 ശതമാനം, മൂന്നാംഘട്ടത്തിൽ പൂർണതോതിൽ എന്നിങ്ങനെ സാധാരണ നിലയിലേക്ക് പ്രവർത്തനങ്ങൾ തിരിച്ചുകൊണ്ടുവരുകയാണ് ലക്ഷ്യം. വിദേശരാജ്യങ്ങൾ നിയന്ത്രണങ്ങളിൽ ഇളവു​വരുത്തുന്നതിനനുസരിച്ച്​ വിമാന സർവിസിന്​ അനുമതി നൽകുമെന്ന്​ ഇന്ത്യൻ വ്യോമയാന മന്ത്രി ഹർദീപ്​ സിങ്​ പുരിയും വ്യക്​തമാക്കിയിട്ടുണ്ട്​. അങ്ങനെ വാണിജ്യവിമാനങ്ങൾ വൈകാതെ ആരംഭിക്കുമെന്ന പ്രതീക്ഷയിലാണ്​ പ്രവാസികൾ.