പൂർണ കർഫ്യൂ ഫലപ്രദമെന്ന്​ വിലയിരുത്തൽ

കുവൈത്ത്​ സിറ്റി: കോവിഡ്​ പ്രതിരോധത്തിന്​ കുവൈത്തിൽ നടപ്പാക്കിയ പൂർണ കർഫ്യൂ ഫലപ്രദമെന്ന്​ ആരോഗ്യ മന്ത്രാലയത്തി​​െൻറ വിലയിരുത്തൽ. 
വരുംദിവസങ്ങളിൽ പുതിയ രോഗബാധിതരുടെ എണ്ണത്തിൽ പ്രകടമായ കുറവുണ്ടാവുമെന്നാണ്​ മന്ത്രാലയത്തി​​െൻറ നിരീക്ഷണമെന്ന്​ ഉന്നത വൃത്തങ്ങളെ ഉദ്ധരിച്ച്​ അൽ ഖബസ്​ ദിനപത്രം റിപ്പോർട്ട്​ ചെയ്​തു. മേയ്​ 30നുശേഷം പൂർണ കർഫ്യൂവിൽ ഇളവുണ്ടാവും. ക്രമേണ സാധാരണ ജീവിതത്തിലേക്ക്​ എത്തുന്ന കർമപദ്ധതിയാണ്​ അധികൃതർ തയാറാക്കിയത്​. കഴിഞ്ഞദിവസം ആരംഭിച്ച റാൻഡം കോവിഡ്​ പരിശോധന നിർണായക ചുവടുവെപ്പാണ്​. 

എല്ലാവരെയും പരിശോധിക്കുക എളുപ്പമല്ലാത്തതിനാൽ ഫോൺ നമ്പർ അടിസ്ഥാനമാക്കി നടത്തുന്ന റാൻഡം പരിശോധനയിൽ ഏതൊക്കെ ഭാഗങ്ങളിലാണ്​ ​കോവിഡ്​ ഉള്ളതെന്ന്​ കണ്ടെത്താമെന്നും പിന്നീട്​ ആ ഭാഗങ്ങളിൽ കൂടുതൽ ശ്രദ്ധിക്കാമെന്നുമാണ്​ കണക്കുകൂട്ടൽ. നിലവിലെ സമഗ്ര നിയന്ത്രണം ഏറെനാൾ തുടരാൻ കഴിയില്ല. വിപണിയുടെയും സാമ്പത്തിക വ്യവസ്ഥയുടെയും അടിത്തറയിളക്കുന്ന അത്തരം നടപടിക്ക്​ സർക്കാർ മുതിരില്ല. മാസങ്ങ​ളായി ജോലിയും വരുമാനവുമില്ലാതെ പരസഹായത്താൽ കഴിയുന്ന ലക്ഷക്കണക്കിനാളുകളെയും പരിഗണിക്കേണ്ടതുണ്ട്​.