കോവിഡ്​ മുക്​തരായവർ പ്ലാസ്​മ നൽകണമെന്ന്​ രക്​തബാങ്ക്​

കുവൈത്ത്​ സിറ്റി: രാജ്യത്ത്​ കോവിഡ്​ മുക്​തരായവർ പ്ലാസ്​മ നൽകണമെന്ന്​ അഭ്യർഥനയുമായി കുവൈത്ത്​ സെൻട്രൽ ബ്ലഡ്​ ബാങ്ക്​. രോഗപ്രതിരോധ പ്ലാസ്മക്ക്​ വർധിച്ചുവരുന്ന ആവശ്യം നിറവേറ്റാനായി കോവിഡ്​ മുക്​തർ മുന്നോട്ടുവരണം. പ്ലാസ്​മ ചികിത്സ ഫലപ്രദമാണെന്ന്​ കണ്ടെത്തിയിട്ടുണ്ട്​.

പ്ലാസ്മ ദാന പ്രക്രിയക്ക് മുമ്പായി പാലിക്കേണ്ട നടപടിക്രമങ്ങളും വ്യവസ്ഥകളും ഉണ്ട്. സുഖം പ്രാപിച്ച വ്യക്തി രോഗലക്ഷണമില്ലാത്തവരും രണ്ടാഴ്​ചത്തെ ക്വാറൻറീൻ കാലാവധി കഴിഞ്ഞവരുമാവണം.

18 വയസ്സിന് മുകളിൽ പ്രായമുള്ള, വിട്ടുമാറാത്ത രോഗങ്ങളൊന്നുമില്ലാത്തവർക്ക്​ പ്ലാസ്​മ നൽകാമെന്ന്​ ആരോഗ്യ മന്ത്രാലയത്തിലെ രക്​ത കൈമാറ്റ വകുപ്പ്​ മേധാവി ഡോ. റീം അൽ രിദ്​വാൻ പറഞ്ഞു.

പ്ലാസ്​മ നൽകാൻ തയാറുള്ളവർ https://btas-kw.org/ccpdonation എന്ന വെബ്​സൈറ്റിൽ രജിസ്​റ്റർ ചെയ്യണം. കഴിഞ്ഞ ഏപ്രിലിലാണ്​ കുവൈത്തിൽ കോവിഡ്​ ചികിത്സക്കായി പ്ലാസ്​മ സ്വീകരിച്ചുതുടങ്ങിയത്​. ഇതുവരെ 1700 പ്ലാസ്​മ ബാഗ്​ സ്വീകരിച്ചു. 1200 ബാഗ്​ വിതരണം ചെയ്​തതായും അവർ കൂട്ടിച്ചേർത്തു.

രോഗത്തെ പ്രതിരോധിക്കുകയും വൈറസ്​ ബാധിതരെ ഗുരുതരാവസ്ഥയിൽനിന്ന്​ സംരക്ഷിക്കുകയും ചെയ്യുന്ന ആൻറിബോഡികൾ രക്​ത പ്ലാസ്​മയിൽ അടങ്ങിയിട്ടുണ്ടെന്നാണ്​ കണ്ടെത്തൽ.