കുവൈത്തിൽ വൈദ്യുതിയും വിച്​ഛേദിക്കുന്നു; ബാച്ചിലർമാർ ദുരിതത്തിൽ

കുവൈത്ത്​ സിറ്റി: സ്വദേശി താമസ മേഖലയിലെ ബാച്ചിലർമാരെ ഒഴിപ്പിക്കുന്നതി​​െൻറ ഭാഗമായി രാജ്യത്തി​​െൻറ വിവിധ ഭാ ഗങ്ങളിൽ കെട്ടിടങ്ങളിലെ വൈദ്യുതി കണക്ഷൻ റദ്ദാക്കുന്നത്​ തുടരുന്നു. കഴിഞ്ഞ രണ്ടുദിവസത്തിനിടെ നൂറോളം ഫ്ലാറ്റ ുകളിലെ വൈദ്യുതി വി​ച്​ഛേദിച്ചു. ഖൈത്താൻ, ജഹ്​റ, ജലീബ്​, സബാഹ്​ അൽ അഹ്​മദ്​, വഫ്ര, അർദിയ, മഹബൂല തുടങ്ങിയ ഭാഗങ്ങളിൽ നടപടിയുണ്ടായി.

കോവിഡ്​ പ്രതിരോധ നടപടികളുടെ ഭാഗമായുള്ള നിയന്ത്രണങ്ങൾ കൂടി ആയപ്പോൾ ദുരിതം ഇരട്ടിയാണ്​. അതേസമയം, സ്വദേശി താമസ മേഖലകളിൽ വിദേശി ബാച്ചിലർമാർ താമസിക്കാൻ പാടില്ലാത്തതാണെന്നും ഒഴിഞ്ഞുപോവാൻ നേരത്തെ മുന്നറിയിപ്പ്​ നൽകിയതാണെന്നുമാണ്​ അധികൃതർ വ്യക്​തമാക്കുന്നത്​.

ആഭ്യന്തര മന്ത്രാലയം, സിവില്‍ ഇന്‍ഫര്‍മേഷന്‍ വകുപ്പ്, ജലവൈദ്യുതി മന്ത്രാലയം, മറ്റു സര്‍ക്കാര്‍ സംവിധാനങ്ങൾ എന്നിവയുമായി സഹകരിച്ചാണ്​ മുനിസിപ്പാലിറ്റി പരിശോധന നടത്തുന്നത്​. 139 എന്ന ഹോട്ട്​ലൈന്‍ നമ്പര്‍ വഴിയും വെബ്​സൈറ്റിലൂടെയും ലഭിക്കുന്ന പരാതികളിൽ ഉടൻ നടപടി സ്വീകരിച്ചുവരുന്നുണ്ട്​. 24727732 എന്ന വാട്​സാപ്​ നമ്പറിലൂടെയും പരാതി സ്വീകരിക്കുന്നുണ്ട്​.

വിദേശികൾക്കിടയിൽ കോവിഡ്​ വ്യാപിച്ച പശ്ചാത്തലത്തിൽ കുവൈത്തിൽ ഇപ്പോൾ കൂടുതലായി ഒഴിപ്പിക്കാൻ പരാതി നൽകുന്നുണ്ട്​. ഇൗ വർഷം രാജ്യത്തെ മുഴുവൻ സ്വദേശി പാർപ്പിട മേഖലകളും കുടുംബത്തോടൊപ്പമല്ലാതെ താമസിക്കുന്ന വിദേശികളെ പൂർണമായി ഒഴിപ്പിക്കുമെന്നാണ്​ തീരുമാനിച്ചിട്ടുള്ളത്​. സാമ്പത്തിക ലാഭത്തിനായി സ്വദേശികൾ അപ്പാർട്ടുമ​െൻറുകൾ വിവിധ ഭാഗങ്ങളാക്കി തിരിച്ച്​ വിദേശികൾക്ക്​ വാടകക്ക്​ നൽകുന്നതാണ്​ ബാച്ചിലർ സാന്നിധ്യത്തിന്​ വഴിവെച്ചിരുന്നത്​. ഇത്തരം കെട്ടിട ഉടമകൾക്കെതിരെ ശക്​തമായ നടപടി സ്വീകരിക്കുമെന്ന്​ അധികൃതർ വ്യക്​തമാക്കിയിട്ടുണ്ട്​.