ലോകകപ്പ്​ യോഗ്യത: കുവൈത്തിനെ മൂന്ന്​ ഗോളിന്​ കീഴടക്കി ആസ്​ത്രേലിയ

കുവൈത്ത്​ സിറ്റി: ലോകകപ്പ്​ ഫുട്​ബാൾ യോഗ്യത മത്സരത്തിൽ ആസ്​ത്രേലിയക്കെതിരെ കുവൈത്തിന്​ മൂന്നുഗോൾ തോൽവി. ആദ്യപാദത്തിലും ഇതേ സ്​കോറിനായിരുന്നു ഇരു ടീമുകളും കളി അവസാനിപ്പിച്ചിരുന്നത്​. ശൈഖ്​ ജാബിർ സ്​റ്റേഡിയത്തിൽ നടന്ന മത്സരത്തിൽ കരുത്തരായ എതിരാളികൾക്കെതിരെ കുവൈത്ത്​ പൊരുതി നോക്കിയെങ്കിലും വിജയം എത്തിപ്പിടിക്കാവുന്നതിനും അപ്പുറത്തായിരുന്നു. ആദ്യ മിനിറ്റിൽ തന്നെ മഞ്ഞപ്പട വല കുലുക്കി. മാത്യൂ ലക്കിയിലൂടെയാണ്​ ഒാസീസി​െൻറ ഭാഗ്യം. 24ാം മിനിറ്റിൽ ജാക്​സൻ ഇർവിൻ, 66ാം മിനിറ്റിൽ അജ്​ദിൻ റുസ്​റ്റിക്​ എന്നിവരും ഗോൾ നേടി. പ്രതിരോധം ശക്​തമാക്കി കൗണ്ടർ അറ്റാക്കി​ലൂടെ ഗോൾ നേടുകയെന്ന തന്ത്രമാകും കുവൈത്ത്​ പുറത്തെടുക്കുക എന്ന തന്ത്രവുമായി മൈതാനത്തിറങ്ങിയ കുവൈത്തിന്​ ആദ്യ മിനിറ്റിൽ തന്നെ ഗോൾ വീണത്​ തിരിച്ചടിയായി. പിന്നീടൊരു ഘട്ടത്തിലും അവർക്ക്​ തിരിച്ചുവരാൻ അവസരമുണ്ടായില്ല.

സ്​കോർ സൂചിപ്പിക്കുന്നത്​ പോലെ തന്നെയായിരുന്നു കളിയും. 55 ശതമാനവും സമയം ആസ്​ത്രേലിയയുടെ പക്കലായിരുന്നു പന്ത്​. ആറ്​ ഷോട്ടുകൾ അവർ പോസ്​റ്റിലേക്ക്​ പായിച്ചപ്പോൾ ഒന്നുമാത്രമായിരുന്നു മറുപടി. 11 കോർണർ കിക്കുകൾ മഞ്ഞപ്പടക്ക്​ അനുകൂലമായും അഞ്ച്​ കോർണറുകൾ കുവൈത്തിന്​ അനുകൂലമായും വന്നു. ഒാസീസ്​ പ്രതിരോധത്തിന്​ കനത്ത ഭീഷണി ഉയർത്തുന്ന സന്ദർഭങ്ങൾ സൃഷ്​ടിക്കാൻ കുവൈത്തി താരങ്ങൾക്ക്​ കഴിഞ്ഞില്ല. അഞ്ച്​ കളിയും ക്ലീനായി ജയിച്ച ആസ്​ത്രേലിയ 15 പോയൻറുമായി ഗ്രൂപ്പിൽ ഒന്നാമതാണ്​. കുവൈത്തിനും ജോർഡനും പത്ത്​ പോയൻറ്​ വീതമുണ്ട്​.

ഗോൾ ശരാശരിയുടെ പിൻബലത്തിൽ കുവൈത്ത്​ രണ്ടാം സ്ഥാനം നിലനിർത്തിയെങ്കിലും ജോർഡൻ ഒരു കളി കുറച്ചേ കളിച്ചിട്ടുള്ളൂ. ആറ്​ കളിയിൽ ആറ്​ പോയൻറുള്ള നേപ്പാൾ ആണ്​ നാലാമത്​. എല്ലാ കളിയും തോറ്റ ചൈനീസ്​ തായ്​പേയിക്ക്​ പോയ​െൻറന്നുമില്ല. ജൂൺ 11ന്​ ജോർഡനെതിരെയും 15ന്​ ചൈനീസ്​ തായ്​പേയിക്കെതിരെയും കുവൈത്തിന്​ മത്സരമുണ്ട്​. രണ്ടാം സ്ഥാനക്കാരായി പ്ലേ ഒാഫിനെങ്കിലും യോഗ്യത നേടണമെങ്കിൽ ജോർഡനെതിരെ കുവൈത്തിന്​ ജയിച്ചേ പറ്റൂ. ചൈനീസ്​ തായ്​പേയിയെ നീലപ്പട അനായാസം കീഴടക്കുമെന്നാണ്​ കരുതുന്നത്​.