ഏഷ്യൻ ജൂനിയർ ചാമ്പ്യൻഷിപ്പ്: കുവൈത്തിന് വിജയത്തുടക്കം

കുവൈത്ത് സിറ്റി: ജോർഡനിൽ നടക്കുന്ന പതിനൊന്നാമത് ഏഷ്യൻ ജൂനിയർ ചാമ്പ്യൻഷിപ്പിൽ കുവൈത്തിന് വിജയത്തുടക്കം. ആദ്യ മത്സരത്തിൽ കുവൈത്ത് ജൂനിയർ ഹാൻഡ്‌ബോൾ ടീം സിറിയയെ 29-19 എന്ന സ്‌കോറിന് പരാജയപ്പെടുത്തി.

ആദ്യ പകുതിയിൽ മികച്ച പ്രകടനം കാഴ്ചവെച്ച കുവൈത്ത് ടീം ഒരു ഗോളിന് (13-12) മുന്നിലെത്തി. രണ്ടാം പകുതിയിൽ കൂടുതൽ കരുത്തോടെ തിരിച്ചെത്തി ലീഡ് വർധിപ്പിക്കുകയും ടൂർണമെന്റിലെ തങ്ങളുടെ ആദ്യ വിജയം ഉറപ്പിക്കുകയും ചെയ്തു.

കുവൈത്തിന്റെ അബ്ദുൽ ഹാദി ബരാക് മത്സരത്തിലെ മികച്ച കളിക്കാരനായി തെരഞ്ഞെടുക്കപ്പെട്ടു. ഉസ്‌ബെക്കിസ്താനെ 47-29 എന്ന സ്‌കോറിന് പരാജയപ്പെടുത്തി ദക്ഷിണ കൊറിയയും തങ്ങളുടെ ആദ്യ മത്സരത്തിൽ വിജയിച്ചു. 10 ടീമുകൾ പങ്കെടുക്കുന്ന ഏഷ്യൻ ജൂനിയർ ചാമ്പ്യൻഷിപ്പ് ആഗസ്റ്റ് 31 വരെ തുടരും.