വീട്ടുജോലിക്കാർക്ക്​ ഡിസംബർ ഏഴുമുതൽ വരാൻ അനുമതി

കുവൈത്ത്​ സിറ്റി: നിലവിൽ നേരിട്ട്​ വിമാന സർവീസ്​ ഇല്ലാത്ത രാജ്യങ്ങളിൽനിന്ന്​ കുവൈത്തിലേക്ക്​ ഗാർഹികത്തൊഴിലാളികൾക്ക്​ ഡിസംബർ ഏഴുമുതൽ വരാൻ മന്ത്രിസഭ അനുമതി നൽകി. രണ്ടാഴ്​ച ഇൻസ്​റ്റിറ്റ്യൂഷനൽ ക്വാറൻറീനിൽ ഇരിക്കണമെന്ന നിബന്ധനയോടെയാണ്​ അനുമതി നൽകിയത്​. വിമാന ടിക്കറ്റി​െൻറയും ക്വാറൻറീനി​െൻറയും ചെലവ്​ സ്​പോൺസർ വഹിക്കണം. കോവിഡ്​ പരിശോധന സർക്കാർ ചെലവിൽ നടത്തും. സ്​പോൺസർ വഹിക്കേണ്ട ചെലവ്​ രണ്ടു തവണയായി നൽകിയാൽ മതിയാവും എന്നാണ്​ വിവരം.

വിമാന ടിക്കറ്റ്​ തുക ആദ്യം നൽകുകയും ക്വാറൻറീൻ ചെലവ്​ രണ്ടാം ഘട്ടമായി തൊഴിലാളി ഇവിടെ എത്തിയതിന്​ ശേഷവും നൽകുക എന്ന രീതിയിലാണ്​ ക്രമീകരണം. ഡിസംബർ ഏഴുമുതൽ വരാൻ മന്ത്രിസഭ അനുമതി നൽകിയ സ്ഥിതിക്ക്​ ഇനി ബന്ധപ്പെട്ട വകുപ്പുകൾ അതനുസരിച്ച്​ പദ്ധതി തയാറാക്കും. അവധിക്ക്​ നാട്ടിൽ പോയ ഗാർഹികത്തൊഴിലാളി​കളെ തിരിച്ചെത്തിക്കാനാണ്​ വിവിധ സർക്കാർ വകുപ്പുകൾ സംയുക്​തമായി പദ്ധതി തയാറാക്കിയത്​. ഇന്ത്യ, ശ്രീലങ്ക, ബംഗ്ലാദേശ്​, നേപ്പാൾ, ഫിലിപ്പീൻസ്​ എന്നിവിടങ്ങളിൽനിന്നുള്ളവരെയാണ്​ ആദ്യഘട്ടത്തിൽ കൊണ്ടുവരിക.

ഇന്ത്യയിൽനിന്നുള്ളവർക്കാണ്​ ആദ്യ പരിഗണന. ഇഖാമ കാലാവധിയുള്ളവരെയാണ്​ ആദ്യഘട്ടത്തിൽ വരാൻ അനുവദിക്കുക. ഇതിനായി സ്​പോൺസർമാർ ഒാൺലൈൻ പ്ലാറ്റ്​ഫോമിൽ രജിസ്​റ്റർ ചെയ്യണം. കുവൈത്ത്​ എയർവേയ്​സ്​, ജസീറ എയർവേയ്​സ്​ എന്നിവയാണ്​ പ്രത്യേക വിമാന സർവീസുകൾ നടത്തുക. സ്​പോൺസർമാർക്ക്​ രജിസ്​റ്റർ ചെയ്യാനുള്ള ഒാൺലൈൻ പ്ലാറ്റ്​ഫോം അടുത്ത ദിവസം തയാറാക്കും.

പ്രതിദിനം 600 ​വരെ ​ജോലിക്കാരെ കൊണ്ടുവരാനാണ്​ അധികൃതർ ശ്രമിക്കുന്നത്​. അവധിക്ക്​ പോയ വീട്ടുജോലിക്കാർക്ക്​ തിരിച്ചുവരാൻ കഴിയാത്തത്​ ഇൗ മേഖലയിൽ വൻ പ്രതിസന്ധി സൃഷ്​ടിച്ചിട്ടുണ്ട്​. തുടർന്നാണ്​ തിരിച്ചുകൊണ്ടുവരാൻ ആവശ്യമായ നടപടികൾ സ്വീകരിക്കാൻ വിവിധ വകുപ്പുകൾക്ക്​ മന്ത്രിസഭ നിർദേശം നൽകിയത്​. ആരോഗ്യ മന്ത്രാലയം, വ്യോമയാന വകുപ്പ്​, ആഭ്യന്തര മന്ത്രാലയം, മാൻപവർ അതോറിറ്റി എന്നിവ ചേർന്നാണ്​ തൊഴിലാളികളുടെ മടങ്ങിവരവിന്​ പദ്ധതി തയാറാക്കുക.