വിമാന വിലക്ക്​ നീക്കൽ: കാത്തിരിപ്പ്​ നീളുന്നു; മന്ത്രിസഭ യോഗത്തിൽ തീരുമാനമില്ല

കുവൈത്ത്​ സിറ്റി: 34 രാജ്യങ്ങളിൽനിന്ന്​ നേരിട്ട്​ കുവൈത്തിലേക്കുള്ള വിമാന വിലക്ക്​ നീക്കുന്നത്​ സംബന്ധിച്ച്​ കാത്തിരിപ്പ്​ നീളുന്നു. തിങ്കളാഴ്​ച ചേർന്ന മന്ത്രിസഭ യോഗത്തിലും ഇതുസംബന്ധിച്ച്​ തീരുമാനമായില്ല. ചർച്ചകൾ ശുഭകരമാണെങ്കിലും തീരുമാനം വൈകുകയാണ്​. പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹ്​ കുവൈത്ത്​ എയർവേ​സ്​, ജസീറ എയർവേ​സ്​ മേധാവികളുമായും വ്യോമയാന വകുപ്പ്​ മേധാവിയുമായും പ്രത്യേകം കൂടിക്കാഴ്​ച നടത്തിയത്​ പ്രതീക്ഷ വർധിപ്പിച്ചിരുന്നു.

ഏഴുദിവസം യാത്രക്കാരൻ സ്വന്തം ചെലവിൽ ഇൻസ്​റ്റിറ്റ്യൂഷനൽ ക്വാറൻറീനിൽ കഴിയണമെന്ന വ്യവസ്ഥയോടെ കുവൈത്തി​ലേക്ക്​ നേരിട്ട്​ വരാൻ അനുവദിക്കണമെന്ന നിർദേശമാണ്​ വിമാന കമ്പനികൾ മുന്നോട്ടുവെച്ചത്​. നിർദേശം പഠിക്കുമെന്ന്​ ആരോഗ്യമന്ത്രി പ്രഖ്യാപിച്ചതും തുടർന്ന്​ പ്രധാനമന്ത്രി വിമാനക്കമ്പനികളുമായും വ്യോമയാന വകുപ്പ്​ മേധാവിയുമായും ചർച്ച നടത്തിയതും പ്രവാസി സമൂഹം പ്രതീക്ഷയോടെ കണ്ടു. എന്നാൽ, തിങ്കളാഴ്​ച തീരുമാനമായില്ല. 50ാം ദേശീയ ദിനം ആഘോഷിക്കുന്ന ഒമാന്​ കുവൈത്ത്​ മന്ത്രിസഭ അഭിനന്ദനം അറിയിച്ചു. കുവൈത്ത്​ അമീർ ആഭ്യന്തര മന്ത്രാലയം, അഗ്​നിശമന വകുപ്പ്​ ആസ്ഥാനം സന്ദർശിച്ചത്​ ആഭ്യന്തര മന്ത്രി അനസ്​ അൽ സാലിഹ്​ റിപ്പോർട്ട്​ ചെയ്​തു. മഴക്കാല മുന്നൊരുക്കങ്ങളിൽ യോഗം തൃപ്​തി പ്രകടിപ്പിച്ചു.