കുവൈത്തിൽനിന്ന്​ എട്ടുലക്ഷം ഇന്ത്യക്കാർ തിരിച്ചുപോ​വേണ്ടി വരുമോ​? സത്യമിതാണ്​

കുവൈത്ത്​ സിറ്റി: കുവൈത്തിൽനിന്ന്​ എട്ടുലക്ഷം ഇന്ത്യക്കാർ തിരിച്ചുപോവേണ്ടി വരുമെന്ന വാർത്ത സമീപ ദിവസങ്ങളിൽ പ്രവാസികളെ ആശങ്കയിലാക്കിയിട്ടുണ്ട്​. ഇതിലെ സത്യമെന്താണ്​​? ജനസംഖ്യാ സന്തുലനം സാധ്യമാക്കുന്നതിനായി ഒാരോാ രാജ്യക്കാർക്കും ക്വാട്ട നിശ്ചയിക്കണമെന്ന കരടുനിയമമാണ്​ വാർത്തക്ക്​ അടിസ്ഥാനം. ഇൗ ചർച്ച തുടങ്ങിയിട്ട്​ വർഷങ്ങളായി.

കുവൈത്ത്​ പാർലമ​െൻറിലും സമൂഹത്തിലും ഏറെക്കാലമായി എതിർത്തും അനുകൂലിച്ചും വാദങ്ങളുണ്ട്​. ചിലർ പ്രായോഗിക ബുദ്ധിമുട്ടുകൾ ചൂണ്ടിക്കാട്ടിയും ചിലർ മാനുഷിക വശം പരിഗണിച്ചും മറ്റു ചിലർ ഭരണഘടനക്ക്​ എതിരാണെന്നും ചൂണ്ടിക്കാട്ടിയാണ്​ എതിർത്തത്​. ഇൗ വാദം പരിഗണിച്ച കുവൈത്ത്​ പാർലമ​െൻറിലെ ലീഗൽ ആൻഡ്​ ലെജിസ്ലേറ്റീവ്​ കമ്മിറ്റി വിഷയം പഠിക്കുകയും ക്വാട്ട നിശ്ചയിക്കുന്നത്​ ഭരണഘടനക്ക്​ എതിരല്ലെന്ന്​ വ്യക്​തമാക്കുകയും ചെയ്​തതാണ്​ പുതിയ സംഭവ വികാസം.

ഇൗ സമിതി തന്നെ കൂടുതൽ പഠനത്തിനായി മറ്റൊരു സമിതിക്ക്​ ശിപാർശ നൽകിയിട്ടുമുണ്ട്​. നിയമം നടപ്പാവണമെങ്കിൽ ഇനിയും ഒ​േട്ടറെ കടമ്പകളുണ്ട്​. പാർലമ​െൻറിൽ പാസാവുകയും മന്ത്രിസഭ അംഗീകരിക്കുകയും വേണം. പ്രാ​യോഗിക വശങ്ങൾ കൂടി പരിഗണിച്ചാണ്​ മന്ത്രിസഭ തീരുമാനമെടുക്കുക. രാജ്യങ്ങൾക്ക്​ ക്വാട്ട നിശ്ചയിക്കുന്നത്​ അനുയോജ്യമാവില്ലെന്ന്​ കഴിഞ്ഞ ദിവസം കുവൈത്ത്​ പാർലമ​െൻറ്​ സ്​പീക്കർ മർസൂഖ്​ അൽ ഗാനിം വ്യക്​തമാക്കിയത്​ ശ്രദ്ധേയമാണ്​.

റിയൽ എസ്​റ്റേറ്റ്​ യൂനിയനും റിക്രൂട്ട്​മ​െൻറ്​ ഏജൻസികളും ക്വാട്ട നിശ്ചയിക്കുന്നതിന്​ എതിരായി ശക്​തമായ സമ്മർദ്ദം ചെലുത്തുന്നുണ്ട്​. ഇനി നിർദേശപ്രകാരം ക്വാട്ട നടപ്പാക്കിയാൽ തന്നെ എട്ടുലക്ഷം ഇന്ത്യക്കാർ തിരിച്ചുപോവേണ്ടി വരില്ല. ഇന്ത്യക്കാർക്ക്​ നിശ്ചയിച്ച ക്വാട്ട മൊത്തം ജനസംഖ്യയുടെ 15 ശതമാനമാണ്​. 43 ലക്ഷമാണ്​ കുവൈത്ത്​ ജനസംഖ്യ. അതുപ്രകാരം ആറര ലക്ഷം ഇന്ത്യക്കാർക്ക്​ കുവൈത്തിൽ നിൽക്കാം.

അധികൃതർ ഒടുവിൽ പുറത്തുവിട്ട കണക്കനുസരിച്ച്​ പത്തരലക്ഷമാണ്​ കുവൈത്തിലെ ഇന്ത്യക്കാർ. ഗാര്‍ഹിക തൊഴില്‍ മേഖലകളില്‍ ഇന്ത്യന്‍ വംശജരാണ് കൂടുതല്‍.  327000 ഇന്ത്യന്‍ ഗാര്‍ഹിക തൊഴിലാളികൾ രാജ്യത്തുണ്ട്​. പൊതുവെ കുവൈത്തിൽ ഗാർഹികത്തൊഴിലാളി ക്ഷാമം നേരിടുന്നുണ്ട്​. വിദേശി ജനസംഖ്യ കുറക്കണമെന്ന്​ തത്വത്തിൽ ധാരണയായതാണ്​. അതിനായുള്ള ചില നടപടികൾ വരുംനാളുകളിൽ പ്രതീക്ഷിക്കാം. അവിദഗ്​ധ തൊഴിലാളികൾക്കാണ്​ തൊഴിൽ നഷ്​ട ഭീഷണിയുള്ളത്​.

വിസക്കച്ചവടം നിയന്ത്രിക്കാനുള്ള ശക്​തമായ നടപടികൾ ഉറപ്പാണ്​. സർക്കാർ മേഖലയിൽ സ്വദേശിവത്​കരണം ശക്​തമാക്കുകയും ചെയ്യും. അതിനപ്പുറം കൂട്ടപിരിച്ചുവിടൽ ഭീഷണി തൽക്കാലം ഇല്ല. ചില തസ്​തികകളിൽ യോഗ്യരായ സ്വദേശികളെ ലഭിക്കാത്തതും സ്വദേശിവത്​കരണത്തിലെ പ്രധാന തടസ്സമാണ്​. ഇന്ത്യൻ തൊഴിലാളികളെ സംബന്ധിച്ച് കുവൈത്ത്​ സമൂഹത്തിൽ​ പൊതുവിൽ തൃപ്​തിയാണുള്ളത്​. താരതമ്യേന കുറഞ്ഞ വേതനത്തിൽ ലഭിക്കുന്ന ഗുണമേന്മയുള്ള തൊഴിൽ സമൂഹമാണ്​ ഇന്ത്യക്കാർ.

നഴ്​സിങ്​, എൻജിനീയറിങ്​ തുടങ്ങി പല മേഖലകളിലും അവർക്ക്​ പകരം വെക്കാൻ ആളില്ല. കോവിഡ്​ കാലത്ത്​ ഇന്ത്യൻ നഴ്​സുമാരുടെ മിടുക്ക്​ കുവൈത്ത്​ അധികൃതർക്ക്​ ബോധ്യമായതാണ്​. ക്വാട്ട നടപ്പാക്കുകയാണെങ്കിൽ തന്നെ ഇന്ത്യക്കാർക്ക്​ നിശ്ചയിച്ച 15 ശതമാനം എന്ന തോത്​ വർധിപ്പിച്ചേക്കും. നവംബറിൽ പാർലമ​െൻറ്​ തെരഞ്ഞെടുപ്പ്​ വരുന്ന പശ്ചാത്തലത്തിൽ എം.പിമാർ സ്വദേശികൾക്ക്​ അനുകൂലമായി വിദേശി വിരുദ്ധ നീക്കങ്ങളുമായി വരുന്നത്​ സ്വാഭാവികമാണ്​. തെരഞ്ഞെടുപ്പ്​ കഴിഞ്ഞാൽ അതങ്ങനെ തീരാറാണ്​ പതിവ്​.