485 പേർക്ക്​ കൂടി കോവിഡ്​; 587 പേർക്ക്​ രോഗമുക്​തി

കുവൈത്ത്​ സിറ്റി: കുവൈത്തിൽ വ്യാഴാഴ്​ച 485 പേർക്ക്​ കൂടി കോവിഡ് സ്ഥിരീകരിച്ചു. ഇതുവരെ 138,822 പേർക്കാണ്​ വൈറസ്​ ബാധിച്ചത്​. 587 പേർഉൾപ്പെടെ 130,426 പേർ രോഗമുക്​തി നേടി. രണ്ടുപേർ കൂടി മരിച്ചതോടെ രാജ്യത്തെ കോവിഡ്​ മരണം 859 ആയി. ബാക്കി 7537 പേരാണ്​ ചികിത്സയിലുള്ളത്​.94 പേർ തീവ്രപരിചരണ വിഭാഗത്തിലാണ്​. 6758 പേർക്കാണ്​ പുതുതായി കോവിഡ്​ പരിശോധന നടത്തിയത്​. ആകെ 10,35,985 പേർക്കാണ്​ കുവൈത്തിൽ ഇതുവരെ ​കോവിഡ്​ പരിശോധന നടത്തിയത്​. ഏതാനും ദിവസങ്ങൾക്ക്​ ശേഷം മരണനിരക്ക്​ കുറഞ്ഞു. തീവ്രപരിചരണ വിഭാഗത്തിൽ മാസങ്ങൾക്ക്​ ശേഷം 100ൽ കുറവ്​ ആളുകളായി. 140ന്​ മുകളിലുണ്ടായിരുന്നതാണ്​ ക്രമേണ കുറഞ്ഞുവന്ന്​ 94ൽ എത്തിയത്​. പുതിയ കേസുകളിലും കുറവുണ്ടാവുന്നുണ്ട്​.

ഇതോടൊപ്പം രോഗമുക്​തരുടെ എണ്ണവും കൂടുന്നതിനാൽ ആകെ ചികിത്സയിലുള്ളവരുടെ എണ്ണം കുറഞ്ഞുവരുന്നു. സമീപദിവസങ്ങളിലെ കോവിഡ്​ വ്യാപനം കുറവുള്ളതിനാൽ ഭാഗിക കർഫ്യൂ ഏർപ്പെടുത്തണമെന്നത്​ ഉൾപ്പെടെ കനത്ത നിർദേശങ്ങൾ ഇപ്പോൾ നടപ്പാക്കേണ്ടതില്ലെന്നാണ്​ മന്ത്രിസഭ തീരുമാനം. നവംബറിൽ കോവിഡ്​ വ്യാപനം വർധിക്കാൻ സാധ്യതയുണ്ടെന്ന്​ വിലയിരുത്തലുണ്ടായിരുന്നെങ്കിലും പ്രതീക്ഷിച്ച വർധന ഉണ്ടായിട്ടില്ല. അന്തരീക്ഷ ഉൗഷ്​മാവ്​ കുറഞ്ഞുവരുന്നതിനാൽ അടുത്ത മാസം നിർണായകമാണ്​. ഏതാനും ദിവസമായി പുതിയ കേസുകളേക്കാൾ കൂടുതലാണ്​ രോഗമുക്​തി.