കുവൈത്ത്​ വിസയുള്ള 426,871 വിദേശികൾ രാജ്യത്തിന്​ പുറത്ത്​

കുവൈത്ത്​ സിറ്റി: കുവൈത്ത്​ വിസയുള്ള 426,871 വിദേശികൾ രാജ്യത്തിന്​ പുറത്ത്​ കഴിയുന്നു. അവധിക്ക് നാട്ടിൽ​ പോയി വിമാന സർവീസ്​ ഇല്ലാത്തതിനാൽ തിരിച്ചുവരാൻ കഴിയാത്തവരാണ്​ ഇതിൽ ഭൂരിഭാഗം പേരും. വർക്ക്​ പെർമിറ്റ്​ കാലാവധി കഴിഞ്ഞവരെ കുവൈത്തിലേക്ക്​ വരാൻ അനുവദിക്കില്ലെന്ന്​ ആഭ്യന്തര മന്ത്രാലയത്തിന്​ കീഴിലെ താമസകാര്യ അസിസ്​റ്റൻറ്​ അണ്ടർ സെക്രട്ടറി മേജർ ജനറൽ അൻവർ അൽ ബർജാസ്​ അൽ അൻബ ദിനപത്രത്തിന്​ നൽകിയ അഭിമുഖത്തിൽ പറഞ്ഞു. കുവൈത്തിലേക്ക്​ വരാനുള്ള എല്ലാ തരം വിസകളും അനുവദിക്കുന്നത്​ താൽക്കാലികമായി നിർത്തിവെച്ചിരിക്കുകയാണ്​. ആരോഗ്യ മന്ത്രാലയത്തിൽനിന്നുള്ള അനുമതി ലഭിക്കുന്ന മുറക്ക്​ ഇത്​ പുനരാരംഭിക്കും.

രാജ്യത്ത്​ അനധികൃതമായി താമസിക്കുന്നവരെ പിടികൂടാൻ വ്യാപക പരിശോധനക്ക്​ പദ്ധതി തയാറാക്കിയിട്ടുണ്ട്​. വിമാന സർവീസ്​ സാധാരണ നിലയിലായാൽ പരിശോധന കാമ്പയിൻ ആരംഭിക്കും. അനധികൃത താമസക്കാരെ പിടികൂടി തിരിച്ചുവരാൻ കഴിയാത്ത വിധം നാടുകടത്തും. രാജ്യത്ത്​ വിദേശികൾ അധികമുള്ളതി​െൻറ ബുദ്ധിമുട്ട്​ കോവിഡ്​ പ്രതിസന്ധികാലം വെളിപ്പെടുത്തി. ജനസംഖ്യാ സന്തുലനം സാധ്യമാക്കാൻ സഹായിക്കും വിധം താമസ നിയമം ഭേദഗതി വരുത്തുമെന്നും അൻവർ അൽ ബർജാസ്​ പറഞ്ഞു.