ഐ.എസ്​ വിരുദ്ധ നീക്കം: കുവൈത്തിനെ പ്രധാന താവളമാക്കാൻ ട്രംപിന്​ പദ്ധതിയെന്ന്​ റി​പ്പോർട്ട്​

കുവൈത്ത്​ സിറ്റി: കുവൈത്തിനെ പ്രധാന താവളമാക്കി ഇസ്​ലാമിക് സ്​റ്റേറ്റ് തീവ്രവാദികൾക്കെതിരെയുള്ള പോരാട്ടം ശക്തിപ്പെടുത്താൻ യു.എസ്​ പ്രസിഡൻറ് ഡോണൾഡ് ട്രംപ്​ പദ്ധതി തയാറാക്കിയതായി റിപ്പോർട്ട്. അമേരിക്കൻ ഭരണകൂടവുമായി ബന്ധപ്പെട്ട വൃത്തങ്ങളെ ഉദ്ധരിച്ച് പ്രാദേശിക പത്രമാണ് ഇക്കാര്യം വെളിപ്പെടുത്തിയത്. 
ഇറാഖിലും സിറിയയിലുമാണ് ഐ.എസ്​ തീവ്രവാദികൾ കൂടുതൽ തമ്പടിച്ചിരിക്കുന്നത്. ഈ രണ്ട് രാജ്യങ്ങൾക്കുമിടിയിൽ തന്ത്രപ്രധാനമായ സ്​ഥാനമാണ് കുവൈത്തിനുള്ളത്. 
കുവൈത്ത്​ കേന്ദ്രീകരിച്ച് രണ്ടു രാജ്യങ്ങളിലെയും ഐ.എസ്​ മേഖലകളിലേക്ക് പോർ വിമാനങ്ങളെ അയക്കുന്നത് ചെലവ് കുറഞ്ഞതും ഫലപ്രദവുമായിരിക്കുമെന്നാണ് കണക്കുകൂട്ടൽ. പ്രാദേശിക തലത്തിലും സഖ്യകക്ഷികളുടെ ആഭിമുഖ്യത്തിലും നടക്കുന്ന ഐ.എസ്​ വിരുദ്ധ സംരംഭങ്ങളെ സഹായിക്കാനും ഇത് ഉതകും. 
തുർക്കിയിലെ അംജർലേക്ക് താവളം കേന്ദ്രീകരിച്ചാണ് ഇപ്പോൾ സിറിയയിലെ ഭീകരവാദികൾക്കെതിരെ പോരാട്ടം നടക്കുന്നത്. നിലവിൽ ഇറാഖിൽ 5500 യു.എസ്​ സൈനികരും സിറിയയിൽ 1000 സൈനികരും പോർ മുഖത്തുണ്ട്. താമസിയാതെ ഐ.എസ്​ വേട്ടക്കായി 1000 സൈനികരെ കൂടി കുവൈത്തിലേക്ക് അയക്കുമെന്ന് പ​െൻറഗൺ വൃത്തങ്ങൾ കഴിഞ്ഞ ആഴ്ച വെളിപ്പെടുത്തിയിരുന്നു. ഇക്കാര്യം കുവൈത്ത്​ അധികൃതരും സ്​ഥിരീകരിച്ചിട്ടു​ണ്ട്​. 
കുവൈത്ത്​ കേന്ദ്രീകരിച്ച് ഐ.എസ്​ താവളങ്ങളെ തകർക്കാനുള്ള പദ്ധതിക്ക് യു.എസ്​ കോൺഗ്രസിൽനിന്ന് ട്രംപിന് അനുമതി ലഭിക്കേണ്ടതുണ്ട്.