മുഹര്‍റം അവധി ഞായറാഴ്ച

കുവൈത്ത് സിറ്റി: വീണ്ടും തുടര്‍ച്ചയായ ഒഴിവുദിവസങ്ങള്‍ ലഭിക്കുന്നതിന്‍െറ ആഹ്ളാദത്തില്‍ കുവൈത്തിലെ ഉദ്യോഗസ്ഥരും വിദ്യാര്‍ഥികളും. മുഹര്‍റം അവധി ഞായറാഴ്ചയാണെന്ന് സിവില്‍ സര്‍വിസ് കമീഷന്‍ ഒൗദ്യോഗികമായി പ്രഖ്യാപിച്ചു. വെള്ളി, ശനി എന്നീ വാരാന്ത്യ അവധിദിനങ്ങളുടെ തൊട്ടടുത്ത ദിവസം മുഹര്‍റം അവധി വരുന്നതോടെ സര്‍ക്കാര്‍ സ്ഥാപനങ്ങള്‍ക്കും വിദ്യാലയങ്ങള്‍ക്കും മൂന്നുദിവസം അടുപ്പിച്ച് അവധി ലഭിക്കും. 
പെരുന്നാളിന് ഒമ്പതുദിവസം അവധി ലഭിച്ച് അധികദിവസം കഴിയുന്നതിനുമുമ്പാണ് വീണ്ടും അടുപ്പിച്ച് അവധി ലഭിക്കുന്നത്. പൊതു അവധികള്‍ക്ക് ഇടയില്‍വന്ന ഒരുദിവസം സര്‍ക്കാര്‍ വിശ്രമദിനമായി പ്രഖ്യാപിച്ചതോടെയാണ് പെരുന്നാളിന് ഒമ്പതുദിവസത്തെ അവധിക്ക് കളമൊരുങ്ങിയത്. ഇതോടെ സെപ്റ്റംബര്‍ ഒന്നുമുതല്‍ ഒക്ടോബര്‍ 24 വരെയുള്ള ദിവസങ്ങള്‍ക്കിടെ 15 ദിവസം ഒഴിവ് ലഭിക്കുന്നു. ഒക്ടോബര്‍ രണ്ടിന് ഗാന്ധിജയന്തി പ്രമാണിച്ച് നാട്ടിലും അവധിയാണ്. രണ്ടിന് കുവൈത്ത് ഇന്ത്യന്‍ എംബസി അവധിയായിരിക്കുമെന്ന് അധികൃതര്‍ അറിയിച്ചിട്ടുണ്ട്.