സിറിയന്‍ അഭയാര്‍ഥി കുട്ടികള്‍ക്ക്  സ്കൂള്‍ കിറ്റുകള്‍ വിതരണം ചെയ്തു

കുവൈത്ത് സിറ്റി: അഭയാര്‍ഥി ക്യാമ്പുകളില്‍ ജീവിതം പ്രയാസത്തിലായ സിറിയന്‍ കുട്ടികള്‍ക്ക് കുവൈത്ത് റെഡ് ക്രസന്‍റിന്‍െറ ആഭിമുഖ്യത്തില്‍ പഠനോപകരണങ്ങള്‍ അടങ്ങുന്ന സ്കൂള്‍ കിറ്റുകള്‍ വിതരണം ചെയ്തു. കിഴക്കന്‍ ലബനാന്‍െറ വിവിധ ഭാഗങ്ങളില്‍ ടെന്‍റുകളില്‍ കഴിയുന്ന ആയിരത്തോളം സിറിയന്‍ കുടുംബങ്ങളിലെ കുട്ടികള്‍ക്കാണ് സഹായം എത്തിച്ചുനല്‍കിയത്. ലബനാനിലെ റെഡ് ക്രസന്‍റ് കാര്യ ചുമതലയുള്ള ഡോ. മുസായിദ് അല്‍ഇന്‍സിയാണ് ഇക്കാര്യം വ്യക്തമാക്കിയത്. പേന, പെന്‍സില്‍, പുസ്തകങ്ങള്‍, വാട്ടര്‍ ബോട്ടിലുകള്‍, ബാഗ് ഉള്‍പ്പെടെയുള്ള കിറ്റുകളാണ്  ടെന്‍റുകളില്‍ ദുരിതജീവിതം നയിക്കുന്ന കുടുംബങ്ങളിലെ കുട്ടികള്‍ക്ക് നല്‍കിയത്. മുമ്പ് നിരവധി തവണകളായി മരുന്നും ഭക്ഷണവും ഉള്‍പ്പെടെയുള്ള അവശ്യവസ്തുക്കള്‍ ലബനാന്‍, ജോര്‍ഡന്‍ എന്നിവിടങ്ങളിലെ സിറിയന്‍ അഭയാര്‍ഥികള്‍ക്കിടയില്‍ റെഡ് ക്രെസന്‍റ് വിതരണം ചെയ്തിരുന്നു.