മയക്കുമരുന്ന് ലഹരിയില്‍ മൂന്നുവയസ്സുകാരിയെ  കൊന്ന് ഫ്രീസറില്‍ സൂക്ഷിച്ച പിതാവ് പിടിയില്‍

കുവൈത്ത് സിറ്റി: മയക്കുമരുന്നിന്‍െറ ലഹരിയില്‍ മകളെ ക്രൂരമായി ഉപദ്രവിച്ച് കൊലപ്പെടുത്തിയശേഷം ഫ്രീസറില്‍ സൂക്ഷിച്ച പിതാവും അതിന് കൂട്ടുനിന്ന ഭാര്യയും പിടിയില്‍. 26കാരനായ സ്വദേശി യുവാവും 23കാരിയായ ഭാര്യയുമാണ് പിടിയിലായത്. 
ഒരാഴ്ചമുമ്പാണ് കൊലപാതകം നടത്തിയതെന്ന് പിടിയിലായ പിതാവ് പൊലീസിനോട് വെളിപ്പെടുത്തി. അമിതമായി മയക്കുമരുന്ന് കഴിച്ച പ്രതി മൂന്നു വയസ്സുകാരിയായ മകളെ പൊള്ളിച്ചും മുറിവേല്‍പ്പിച്ചും ക്രൂരമായി പീഡിപ്പിക്കുകയായിരുന്നു. ഇതിനിടെ മരണം സംഭവിച്ച മകളുടെ മൃതദേഹം ഫ്രീസറില്‍ സൂക്ഷിക്കുകയായിരുന്നു. അതിനുവേണ്ടി സംഭവദിവസം തന്നെ ഫ്രീസര്‍ വാങ്ങുകയായിരുന്നു. ഒരാഴ്ച കഴിഞ്ഞ് ബന്ധുക്കള്‍ കുട്ടിയെ കാണാത്തതുമായി ബന്ധപ്പെട്ട് തിരക്കിയപ്പോഴാണ് സംഭവം പുറംലോകമറിഞ്ഞത്. പരാതിനല്‍കിയതിനെ തുടര്‍ന്ന് നടത്തിയ അന്വേഷണത്തിലാണ് ഫ്രീസറില്‍നിന്ന് മൃതദേഹം കണ്ടത്തെിയത്. തുടര്‍ നടപടികള്‍ക്കായി ഇരുവരെയും പ്രത്യേക വിഭാഗത്തിലേക്ക് മാറ്റി.