എട്ടു വിഭാഗക്കാരുടെ വിരമിക്കല്‍ പ്രായം 75 ആയി ഉയര്‍ത്തി

കുവൈത്ത് സിറ്റി: രാജ്യത്ത് സര്‍ക്കാര്‍-അര്‍ധ സര്‍ക്കാര്‍ മേഖലയില്‍ ജോലിചെയ്യുന്ന എട്ടു വിഭാഗം ജീവനക്കാരുടെ വിരമിക്കല്‍ പ്രായം 75 വയസ്സായി ഉയര്‍ത്തി. പ്രധാനമന്ത്രി ശൈഖ് ജാബിര്‍ അല്‍മുബാറക് അല്‍ഹമദ് അസ്സബാഹിന്‍െറ അധ്യക്ഷതയില്‍ തിങ്കളാഴ്ച ചേര്‍ന്ന മന്ത്രിസഭായോഗമാണ് ഇതുസംബന്ധിച്ച തീരുമാനമെടുത്തത്. പള്ളികളിലെ ഇമാമുമാര്‍, ഖതീബുമാര്‍, മൃതദേഹം കുളിപ്പിക്കുന്നവര്‍, ഡോക്ടര്‍മാര്‍, മെഡിക്കല്‍ മേഖലയിലെ വിദഗ്ധര്‍, സര്‍ക്കാര്‍ യൂനിവേഴ്സിറ്റികളിലെ പഠന-പരിശീലന അതോറിറ്റി അംഗങ്ങള്‍, സര്‍ക്കാര്‍ ഇന്‍സ്റ്റിറ്റ്യൂട്ടുകളിലെ പഠന-പരിശീലന അതോറിറ്റി അംഗങ്ങള്‍, കുവൈത്ത് ശാസ്ത്ര ഗവേഷണ ഇന്‍സ്റ്റിറ്റ്യൂട്ടിലെ ശാസ്ത്ര ഗവേഷകര്‍ എന്നിവരുടെ വിരമിക്കല്‍ പ്രായമാണ് ഉയര്‍ത്തിയത്. ഈ മേഖലയില്‍ ജോലിചെയ്യുന്ന സ്വദേശികള്‍ക്കെന്നപോലെ വിദേശികള്‍ക്കും ഉത്തരവ് ബാധകമായിരിക്കുമെന്ന് അധികൃതര്‍ വ്യക്തമാക്കി.