അരലക്ഷം സ്വദേശികള്‍ക്ക് ഇലക്ട്രോണിക് പാസ്പോര്‍ട്ട് അടുത്തയാഴ്ച

കുവൈത്ത് സിറ്റി: രാജ്യത്ത് 50,000 സ്വദേശികള്‍ക്ക് അടുത്തയാഴ്ച ഇലക്ട്രോണിക് പാസ്പോര്‍ട്ട് വിതരണം ചെയ്യും. സ്വദേശികളുടെ പാസ്പോര്‍ട്ട് ഇലക്ട്രോണിക് രൂപത്തിലാക്കാന്‍ തീരുമാനിച്ചതിന്‍െറ അടിസ്ഥാനത്തിലാണിത്. ആഭ്യന്തരമന്ത്രാലയത്തിലെ ബന്ധപ്പെട്ട വൃത്തങ്ങളെ ഉദ്ധരിച്ച് പ്രാദേശിക പത്രമാണ് ഇക്കാര്യം റിപ്പോര്‍ട്ട് ചെയ്തത്. സ്വദേശികള്‍ക്ക് ആവശ്യമായ ഇലക്ട്രോണിക് പാസ്പോര്‍ട്ടുകള്‍ നിര്‍മിക്കുന്നതിന് വിദേശത്തെ പ്രമുഖ കമ്പനിക്ക് സര്‍ക്കാര്‍ നേരത്തേ കരാര്‍ നല്‍കിയിരുന്നു. വിദേശ രാജ്യങ്ങളിലേക്ക് പഠനാവശ്യാര്‍ഥം പോകേണ്ട വിദ്യാര്‍ഥികള്‍, രാജ്യത്തിന് പുറത്തേക്ക് ചികിത്സക്ക് പോകേണ്ടവര്‍ തുടങ്ങി യാത്രാരേഖകള്‍ ആവശ്യമായിവരുന്നവര്‍ക്കുള്ള പാസ്പോര്‍ട്ടുകളാണ് ഇതിനകം എത്തിച്ചത്.
ആഭ്യന്തരമന്ത്രാലയത്തിലെ പാസ്പോര്‍ട്ട്-പൗരത്വകാര്യ വകുപ്പുകളില്‍ പ്രത്യേക സംവിധാനം ഏര്‍പ്പെടുത്തി പഴയ പാസ്പോര്‍ട്ടുകള്‍ വാങ്ങിയശേഷം പുതിയ സ്മാര്‍ട്ട് പാസ്പോര്‍ട്ടുകള്‍ വിതരണം ചെയ്യും.