സോഷ്യല്‍ മീഡിയ വഴി കുപ്രചാരണം: കര്‍ശന നടപടിയെന്ന് ആഭ്യന്തര മന്ത്രാലയം

കുവൈത്ത് സിറ്റി: സോഷ്യല്‍ മീഡിയകള്‍വഴി തെറ്റായ വാര്‍ത്തകള്‍ പ്രചരിപ്പിക്കുന്നവര്‍ക്കെതിരെ ശക്തമായ മുന്നറിയിപ്പുമായി ആഭ്യന്തരമന്ത്രാലയം. കഴിഞ്ഞ ഏതാനും ദിവസങ്ങളിലായി സോഷ്യല്‍ മീഡിയകള്‍ രാജ്യസുരക്ഷക്ക് ഭീഷണി ഉയര്‍ത്തുന്ന വിധത്തിലുള്ള സന്ദേശങ്ങള്‍ പ്രചരിപ്പിക്കുന്നതായി കണ്ടത്തെിയിട്ടുണ്ട്. സ്വദേശികള്‍ക്കും വിദേശികള്‍ക്കുമിടയില്‍ പരിഭ്രാന്തി സൃഷ്ടിക്കുക എന്ന ലക്ഷ്യത്തോടെയാണ് ഇത്തരം വാര്‍ത്തകള്‍ പ്രചരിപ്പിക്കുന്നതെന്ന് ആഭ്യന്തരമന്ത്രാലയം പുറത്തിറക്കിയ റിപ്പോര്‍ട്ടില്‍ വ്യക്തമാക്കി. ഇത്തരം സന്ദേശങ്ങള്‍ പ്രചരിപ്പിക്കുന്നവരെ പിടികൂടാന്‍ ബന്ധപ്പെട്ടവര്‍ക്ക് നിര്‍ദേശം നല്‍കിയിട്ടുണ്ടെന്ന് ആഭ്യന്തര മന്ത്രാലം അറിയിച്ചു. സോഷ്യല്‍ മീഡിയകള്‍വഴി കഴിഞ്ഞദിവസം നിരവധി സ്വദേശികള്‍ക്ക് ഭീഷണി സന്ദേശങ്ങള്‍ ലഭിച്ചിട്ടുണ്ട്. സന്ദേശങ്ങള്‍ അയച്ചവരെക്കുറിച്ച് സുരക്ഷാവിഭാഗം അന്വേഷണം നടത്തിവരുകയാണ്.