ദേശീയദിന അവധി  മൂന്നുദിവസംതന്നെ

കുവൈത്ത് സിറ്റി: ദേശീയ, വിമോചന ദിനാഘോഷങ്ങള്‍ പ്രമാണിച്ച് രാജ്യത്തെ സര്‍ക്കാര്‍ സ്ഥാപനങ്ങള്‍ക്കും വിദ്യാലയങ്ങള്‍ക്കും ഇത്തവണ മൂന്നു ദിവസം അവധി നല്‍കണമെന്ന സിവില്‍ സര്‍വിസ് കമീഷന്‍ ശിപാര്‍ശക്ക് മന്ത്രിസഭയുടെ അംഗീകാരം. മന്ത്രിസഭാ യോഗത്തിനുശേഷം മന്ത്രിസഭാകാര്യ, ജല-വൈദ്യുതി മന്ത്രി ശൈഖ് മുഹമ്മദ് അല്‍അബ്ദുല്ല അസ്സബാഹാണ് ഇക്കാര്യം വെളിപ്പെടുത്തിയത്. ഈമാസം 25, 26, 27 എന്നീ ദിനങ്ങളില്‍ പൊതു അവധി നല്‍കുന്ന തരത്തില്‍ തീരുമാനമെടുക്കണമെന്നാണ് സിവില്‍ സര്‍വിസ് കമീഷന്‍ മന്ത്രിസഭക്ക് മുന്നില്‍വെച്ചിരുന്ന നിര്‍ദേശം. ഇതനുസരിച്ച്  ഈമാസം 24ന് അടക്കുന്ന സര്‍ക്കാര്‍ സ്ഥാപനങ്ങളും വിദ്യാലയങ്ങളും ദേശീയ ദിനാഘോഷ അവധി കഴിഞ്ഞ് 28ന് ഞായറാഴ്ച വീണ്ടും പ്രവര്‍ത്തിക്കും. 28 ഉള്‍പ്പെടെ ഇപ്രാവശ്യം ദേശീയ, വിമോചന അവധികള്‍ നാലു ദിവസമുണ്ടാകുമെന്ന തരത്തില്‍ നേരത്തേ അധികൃതര്‍ സൂചന നല്‍കിയിരുന്നു. എന്നാല്‍, അങ്ങനെ നല്‍കേണ്ടതില്ളെന്നും വ്യാഴം, വെള്ളി, ശനി ദിവസങ്ങളില്‍മാത്രം അവധിനല്‍കി ഞായറാഴ്ച പ്രവൃത്തിദിനമായി കണക്കാക്കണമെന്നും കമീഷന്‍ നിര്‍ദേശം സമര്‍പ്പിക്കുകയായിരുന്നു.