പൊലീസ് വാഹനങ്ങളുടെ നിറം മാറുന്നു 

കുവൈത്ത് സിറ്റി: രാജ്യത്ത് ആഭ്യന്തരമന്ത്രാലയത്തിന് കീഴിലെ വിവിധ സുരക്ഷാ വിഭാഗങ്ങള്‍ ഉപയോഗിക്കുന്ന വാഹനങ്ങളുടെ നിറം മാറ്റുന്ന പ്രവര്‍ത്തനങ്ങള്‍ പൂര്‍ത്തിയാവുന്നതായി അധികൃതര്‍. 
ആഭ്യന്തരമന്ത്രി ശൈഖ് മുഹമ്മദ് അല്‍ ഖാലിദ് അസ്സബാഹിന്‍െറ പ്രത്യേക നിര്‍ദേശ പ്രകാരം നവീകരണ പ്രവര്‍ത്തനങ്ങളുടെ ഭാഗമായാണ് പൊലീസ് വാഹനങ്ങളുടെ നിറം മാറ്റുന്നത്. ഇതിന്‍െറ ഭാഗമായി പൊതു സുരക്ഷാ വിഭാഗത്തിലേക്ക് പുതിയ 271 വാഹനങ്ങള്‍ അടുത്ത ആഴ്ചയോടെ മന്ത്രാലയം ഏറ്റുവാങ്ങും.  മന്ത്രാലയത്തിലെ സേവനകാര്യങ്ങളുമായി ബന്ധപ്പെട്ട അണ്ടര്‍ സെക്രട്ടറി മേജര്‍ ജനറല്‍ ഡോ. ഈദ് ബൂസുലൈബ് ആണ് ഇക്കാര്യം വെളിപ്പെടുത്തിയത്. 
അടുത്ത മാസം പകുതിമുതല്‍ രണ്ട് ഘട്ടങ്ങളിലായി ട്രാഫിക് ഡിപ്പാര്‍ട്ട്മെന്‍റിലേക്കും നിറം മാറ്റിയ വാഹനവ്യൂഹം എത്തിച്ചേരും. അതിര്‍ത്തികാര്യ ഡിപ്പാര്‍ട്ട്മെന്‍റിലുള്‍പ്പെടെ മന്ത്രാലയത്തിന് കീഴിലെ എല്ലാ വാഹനങ്ങളിലും ഈ നിറംമാറ്റ പദ്ധതി നടപ്പാക്കാനാണ് ഉദ്ദേശിക്കുന്നത്. 
വിവിധ വകുപ്പുകള്‍ക്ക് വ്യത്യസ്ത നിറങ്ങളിലുള്ള വാഹനങ്ങളാണ് ഒരുങ്ങുന്നത്.