ബിസിനസിലൂടെ നില മെച്ചപ്പെടുത്തിയ  രാജ്യങ്ങളില്‍ കുവൈത്ത് 101ാം സ്ഥാനത്ത്

കുവൈത്ത് സിറ്റി: ബിസിനസ് സംരംഭങ്ങളിലൂടെ നില കൂടുതല്‍ മെച്ചപ്പെടുത്തിയ രാജ്യങ്ങളുടെ പട്ടികയില്‍ കുവൈത്ത് 101ാം സ്ഥാനത്തെന്ന് റിപ്പോര്‍ട്ട്. 168 രാജ്യങ്ങളെ താരതമ്യംചെയ്ത് ലോകബാങ്ക് തയാറാക്കിയ റിപ്പോര്‍ട്ടിലാണ് ഇക്കാര്യമുള്ളത്. അറബ് മേഖലയിലെ രാജ്യങ്ങളില്‍ ഇക്കാര്യത്തില്‍ ഒന്നാം സ്ഥാനത്ത് യു.എ.ഇ ആണ്. 
ലോകതലത്തില്‍ യു.എ.ഇക്ക് പട്ടികയില്‍ 31ാം സ്ഥാനവുമുണ്ട്. ബഹ്റൈന്‍ അറബ്തലത്തില്‍ രണ്ടാം സ്ഥാനവും ലോകതലത്തില്‍ 68ാം സ്ഥാനവും കരസ്ഥമാക്കിയപ്പോള്‍ ഒമാന്‍ അറബ്തലത്തില്‍ മൂന്നാം സ്ഥാനവും ലോകതലത്തില്‍ 70ാം സ്ഥാനവും നേടി. ഭീകരവാദവും തീവ്രവാദവും അഭിമുഖീകരിക്കുമ്പോള്‍തന്നെ തുനീഷ്യ ഇക്കാര്യത്തില്‍ നില മെച്ചപ്പെടുത്തി അറബ് രാജ്യങ്ങളില്‍ നാലാമതായി. ലോകതലത്തില്‍ തുനീഷ്യക്ക് പട്ടികയില്‍ 74ാം സ്ഥാനവുമുണ്ട്. ലോകതലത്തില്‍ 75ാം സ്ഥാനം കൈയടക്കിയ മൊറോകോയാണ് അറബ് മേഖലയില്‍ തുടര്‍ന്നുള്ള സ്ഥാനം കരസ്ഥമാക്കിയത്. 82ാം സ്ഥാനവുമായി ലോകതലത്തില്‍ പട്ടികയില്‍ സ്ഥാനംപിടിച്ച സൗദിക്ക് അറബ്തലത്തില്‍ ആറാം സ്ഥാനമാണുള്ളത്.