കുവൈത്തിൽ 134 പേർക്ക്​ കൂടി കോവിഡ്​; രണ്ട്​ മരണം

കുവൈത്ത്​ സിറ്റി: കുവൈത്തിൽ രണ്ടുപേർ കൂടി കോവിഡ്​ ബാധിച്ച്​ മരിച്ചു. ഇതോടെ ആകെ കോവിഡ്​ മരണം അഞ്ചായി. 58 വയസു ള്ള കുവൈത്തി, 69 വയസുള്ള ഇറാൻ പൗരൻ എന്നിവരാണ്​ മരിച്ചത്​. 64 ഇന്ത്യക്കാരടക്കം 134 പേർക്കാണ്​ പുതുതായി രോഗം സ്ഥിരീകരിച്ചത്​. ഇതോടെ കോവിഡ്​ ബാധിതർ 1658 ആയി.

വെള്ളിയാഴ്​ച 33 പേർ രോഗമുക്​തി നേടി. ഇവരടക്കം ആകെ രോഗമുക്​തി നേടിയവർ 258 ആയി. ബാക്കി 1395 പേരാണ്​ ചികിത്സയിലുള്ളത്​.

പുതുതായി വൈറസ്​ സ്ഥിരീകരിച്ചവരിൽ മൂന്നുപേർ ബ്രിട്ടൻ, സൗദി, ഇറാൻ എന്നിവിടങ്ങളിൽനിന്ന്​ വന്ന സ്വദേശികളാണ്​. 126 പേർ നേരത്തെ സ്ഥിരീകരിച്ചവരുമായി സമ്പർക്കം പുലർത്തിയവരാണ്​.

63 ഇന്ത്യക്കാർ, നാല്​ കുവൈത്തികൾ, 20 ഇൗജിപ്​തുകാർ, 14 ബംഗ്ലാദേശികൾ, നാല്​ നേപ്പാൾ പൗരന്മാർ, നാല്​ പാകിസ്ഥാനികൾ, മൂന്ന്​ ഫിലിപ്പീൻസുകാർ, മൂന്ന്​ ശ്രീലങ്കക്കാർ, രണ്ട്​ ബിദൂനികൾ, സൗദി, അമേരിക്ക, ബ്രിട്ടൻ, ജോർഡൻ, ഇറാൻ, ചൈന, അഫ്​ഗാനിസ്ഥാൻ, കൊമോറോസ്​, കാമറൂൺ എന്നിവിടങ്ങളിൽനിന്നുള്ള ഒാരോരുത്തർ എന്നിവർക്കാണ്​ ഇത്തരത്തിൽ കോവിഡ്​ സ്ഥിരീകരിച്ചത്​. മൂന്ന്​ കുവൈത്തികൾ, ഒരു ഇന്ത്യക്കാരൻ, ഒരു ബംഗ്ലാദേശി എന്നിവർക്ക്​ ഏതുവഴിയാണ്​ വൈറസ്​ ബാധിച്ചതെന്ന്​ കണ്ടെത്തിയിട്ടില്ല.