കുവൈത്തിൽ 13 പേർക്ക്​ ​കൂടി കോവിഡ്​; ആറുപേർക്ക്​ രോഗമുക്​തി

കുവൈത്ത്​ സിറ്റി: കുവൈത്തിൽ വ്യാഴാഴ്​ച 13 പേർക്ക്​ കൂടി കോവിഡ്​ സ്ഥിരീകരിച്ചു. ഇതോടെ രാജ്യത്ത്​ വൈറസ്​ ബാധി ച്ചവരുടെ എണ്ണം 208 ആയി. ഇതിൽ 49 പേർ ​രോഗമുക്​തി നേടി. ബാക്കി 159 പേരാണ്​ ചികിത്സയിലുള്ളത്​.

ആറുപേർ വ്യാഴാഴ്​ചയാണ്​ രോഗമുക്​തി നേടിയത്​. അതിനിടെ തീവ്രപരിചരണ വിഭാഗത്തിലുള്ളവരുടെ എണ്ണം ഒന്ന്​ വർധിച്ച്​ ഏഴായി. മൂന്നുപേർക്കാണ്​ ഗുരുതരാവസ്ഥയുള്ളത്​. ഇവർ പ്രായമുള്ളവരും മറ്റ്​ അസുഖങ്ങൾ ഉള്ളവരുമാണ്​. കോവിഡ്​ ബാധിത പ്രദേശങ്ങളിൽനിന്ന്​ വന്ന 211 പേരാണ്​ നിലവിൽ നിരീക്ഷണ ക്യാമ്പിലുള്ളത്​.

സൗദിയിൽനിന്ന്​ വന്ന രണ്ട്​ കുവൈത്തികൾ, ഇൗജിപ്​തിൽനിന്ന്​ വന്ന രണ്ട്​ കുവൈത്തികൾ, ഫ്രാൻസിൽനിന്ന്​ വന്ന ഒരു കുവൈത്തി, സൗദിയിൽനിന്ന്​ വന്നവരുമായി സമ്പർക്കം പുലർത്തിയ രണ്ട്​ കുവൈത്തികൾ, അസർബൈജാനിൽനിന്ന്​ വന്നവരുമായി ബന്ധം പുലർത്തിയ ഒരു സ്വദേശിയും ഒരു വിദേശിയും ബ്രിട്ടനിൽനിന്ന്​ വന്നവരുമായി സമ്പർക്കം പുലർത്തിയ കുവൈത്തി, വൈറസ്​ ബാധിച്ച ഫിലിപ്പീനിയുമായി സമ്പർക്കം പുലർത്തിയ ഇൗജിപ്​തുകാരൻ, വൈറസ്​ ബാധിച്ച സോമാലിയക്കാരനുമായി ബന്ധം പുലർത്തിയ സോമാലിയൻ പൗരൻ എന്നിവർക്കാണ്​ വ്യാഴാഴ്​ച കോവിഡ്​ സ്ഥിരീകരിച്ചത്​. ഒരു സ്വദേശിക്ക്​ ഏതുവഴിയാണ്​ വൈറസ്​ ബാധിച്ചതെന്ന്​ അന്വേഷിച്ചുവരുന്നു.