സഹിഷ്ണുതയുടെ ദർബാർ

യു.എ.ഇയുടെ സഹിഷ്ണുതയുടെ പ്രതീകമാണ്​ ഗുരു നാനാക്​ ദർബാർ. 2012 ജനുവരി 17ന്​ തുറന്ന ഈ ക്ഷേത്രം പത്ത്​ വയസ്​ പിന്നിട്ടിരിക്കുന്നു.​ യു.എ.ഇയിലെ സിഖുകാർക്ക്​ ആരാധിക്കാനും ആഘോഷം നടത്താനുമായി തുറന്ന ഈ ക്ഷേത്രം ലോകത്തിന്‍റെ വിവിധ ഭാഗങ്ങളിൽ നിന്ന്​ സഞ്ചാരികൾ ഒഴുകിയെത്തുന്ന കേന്ദ്രം കൂടിയാണ്​. യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം സൗജന്യമായി നൽകിയ ഭൂമിയിലാണ്​ ഇത്​ സ്ഥിതിചെയ്യുന്നത്​.

യു.എ.ഇയിലെ സിഖുകാർക്ക്​ മതപരമായ ആഘോഷങ്ങളോ ആരാധനാലയങ്ങളോ വിവാഹ ആഘോഷമോ സംഘടിപ്പിക്കുന്നത്​ പൊതു സ്ഥലം ഉണ്ടായിരുന്നില്ല. ബർദുബൈ ക്ഷേത്രവും വീടുകളുമായിരുന്നു ഇവരുടെ ആശ്രയ കേന്ദ്രം.

ഗുരു ഗ്രന്ഥ്​ സാഹിബിന്‍റ ആരാധനക്കായി സ്വന്തമായി ക്ഷേത്രം വേണമെന്ന ആഗ്രഹമാണ്​ ഇവരെ ഗുരുദ്വാരയുണ്ടാക്കാൻ പ്രേരിപ്പിച്ചത്​. പക്ഷെ, ഒരു ഇസ്​ലാമിക രാജ്യത്ത്​ ഗുരുദ്വാരക്ക്​ സ്ഥലവും അനുമതിയും ലഭിക്കുമോ എന്ന ആശങ്കയുണ്ടായിരുന്നു. 27 വർഷം മുൻപ്​ ഇതിനായി ശ്രമിച്ചെങ്കിലും നടക്കാതെ പോയത്​ ഉദാഹരണമായി മുന്നിലുണ്ടായിരുന്നു. എന്നാൽ, അപ്രതീക്ഷിതമായി യു.എ.ഇ കൗൺസിൽ ഓഫ്​ ഇമാം അനുമതി നൽകുകയയിരുന്നു. സർക്കാർ തന്നെ സ്​ഥലവും വിട്ടുനൽകിയതോടെ 2008ൽ നിർമാണം തുടങ്ങി. ഗൾഫിലെ ആദ്യ ഔദ്യോഗിക സിഖ്​ ക്ഷേത്രം എന്ന മേൻമയോടെയാണ്​ ഇത്​ പടുത്തുയർത്തിയത്​.

വിവാഹങ്ങൾ നടത്തുന്നതിനും മറ്റ് മതപരമായ ചടങ്ങുകൾ നടത്തുന്നതിനും ഗുരുദ്വാര ഉണ്ട്​. ലോകത്തിലെ ഏറ്റവും ആധുനികമായ ഗുരുദ്വാര നിർമ്മിക്കാനുള്ള ശ്രമങ്ങളാണ്​ ഇവിടെ നടന്നത്​. അമൃത്‌സറിലെ സുവർണ്ണക്ഷേത്രത്തിന് ശേഷം ഏറ്റവും മികച്ച ക്ഷേത്രം നിർമിക്കുക എന്നതായിരുന്നു സ്വപ്നം.

അന്താരാഷ്‌ട്ര പ്രശസ്തമായ ദുബൈ ആസ്ഥാനമായ ആർക്കിടെക്റ്റ് സ്ഥാപനം ഹോൾഫോർഡ് അസോസിയേറ്റ്‌സാണ്​ രൂപകൽപന ചെയ്തത്. ഇവർ 20ലധികം ക്രിസ്ത്യൻ പള്ളികളും നാല് മുസ്​ലീം പള്ളികളും ഒരു ക്ഷേത്രവും നിർമിച്ചതാണ്​ ഇവരെ തെരഞ്ഞെടുക്കാൻ കാരണം.

നിർമാണത്തിന്​ മുൻപ്​ അധികൃതർ ലോകമെമ്പാടുമുള്ള ഗുരുദ്വാരകൾ സന്ദർശിച്ചിരുന്നു. 1,25,000 ചതുരശ്ര അടി വിസ്തീർണ്ണമുള്ള മൂന്ന് നിലകളുള്ള കെട്ടിടം 2011 ഡിസംബറിലാണ്​ പൂർത്തിയായത്​. 2012 ജനുവരി 17ന്​ ഗൾഫിലെ ഏറ്റവും വലിയ ഗുരുദ്വാര യു.എ.ഇയിലെ 50,000ഓളം വരുന്ന സിഖ്​ സമൂഹത്തിനായി തുറക്കപ്പെട്ടു. 6.50 കോടി ദിർഹമാണ്​ നിർമാണ ചെലവ്​. സിഖ്​ സമൂഹവും യു.എ.ഇ സർക്കാരും തമ്മിലുള്ള ബന്ധത്തിന്​ ഊഷ്മളത പകർന്ന സംഭവമായിരുന്നു ഗുരുദ്വാരയുടെ നിർമാണം.

സന്ദർശകരു​ടെ ഇഷ്ട കേന്ദ്രം

യു.എ.ഇ സന്ദർശിക്കുന്ന വിനോദ സഞ്ചാരികൾ ഒരിക്കലെങ്കിലും എത്തുന്ന സ്ഥലമാണ്​ ഗുരുദ്വാര. എട്ട്​ ലക്ഷത്തോളം പേർ ഇവിടെയുള്ള കമ്യൂനിറ്റി കിച്ചണിലെ രുചി ആസ്വദിക്കാൻ മാത്രം എത്തിയിട്ടുണ്ട്​.

ഏഷ്യക്ക്​ പുറമെ യു.കെ, യു.എസ്​.എ, യൂറോപ്പ്​, ആഫ്രിക്ക, ആസ്​ട്രേലിയ, കാനഡ തുടങ്ങിയ ഭൂഖണ്ഡങ്ങളിലെയും രാജ്യങ്ങളിലെയും സന്ദർശകരുംഇവിടേക്ക്​ എത്തുന്നുണ്ട്​. വെള്ളിയാഴ്ചകളിൽ 10,000ഓളം വിശ്വാസികൾ സന്ദർശനത്തിന്​ എത്താറുണ്ട്​. പഞ്ചാബിലെ സിഖുകാർ മാത്രമല്ല, പാകിസ്താനിലെയും അഫ്​ഗാനിലെയും സിഖ്​ സമൂഹവും ഇവിടെ പ്രാർഥനക്കായി എത്തുന്നു. വിവാഹ ആഘോഷങ്ങളുടെ ഇഷ്ടകേന്ദ്രം കൂടിയാണിത്​. ദുബൈ ടൂറിസം വകുപ്പിന്‍റെ ലിസ്റ്റിലുള്ള ദുബൈയിലെ ഇഷ്ടകേന്ദ്രങ്ങളിൽ ഒന്നാണിത്​.

സിഖ്​ ആഘോഷ ദിനങ്ങളിൽ ഇവിടേക്ക്​ സന്ദർശകരുടെ ഒഴുക്കായിരിക്കും. മീഡിയേഷൻ റൂമും ലൈബ്രറിയുമെല്ലാം ഇവിടെയുണ്ട്​. റമദാനിൽ മഗ്​രിബ്​ നമസ്കാരത്തിനും ഇഫ്താറിനുമായി ഗുരുദ്വാര തുറന്നുകൊടുത്തിരുന്നു.