ഡിജിറ്റൽ പണമിടപാടിൽ രാജ്യം മുന്നോട്ട്​

മനാമ: രാജ്യത്തെ ഡിജിറ്റൽ പണമിടപാട്​ അതിവേഗം വളർച്ച പ്രാപിക്കുന്നതായി റിപ്പോർട്ട്​. സെൻട്രൽ ബാങ്ക്​ ഓഫ്​ ബഹ്​റൈൻ കഴിഞ്ഞ ദിവസം പുറത്തിറക്കിയ ജൂണിലെ കണക്കുകളാണ്​ ഇക്കാര്യം സൂചിപ്പിക്കുന്നത്​. ജൂണിൽ 14 ദശലക്ഷത്തിലധികം കറൻസി രഹിത ഇടപാടുകളാണ്​ രാജ്യത്ത്​ നടന്നത്​. കഴിഞ്ഞ വർഷം ഇതേ കാലയളവിനേക്കാൾ 74 ശതമാനം വളർച്ചയാണ്​ ഇക്കാര്യത്തിൽ രേഖപ്പെടുത്തിയത്​.

ഡെബിറ്റ്​/ക്രെഡിറ്റ്​ കാർഡ്​ ഉപയോഗിച്ച്​ വ്യാപാരസ്ഥാപനങ്ങളിലെ പോയന്‍റ്​ ഓഫ്​ സെയിൽ (പി.ഒ.എസ്​) മെഷീൻ മുഖേന നടത്തുന്ന ഇടപാടുകളും ഇ-കോമേഴ്​സ്​ ഇടപാടുകളും കാര്യമായ വർധന രേഖപ്പെടുത്തി.

ഈ രണ്ട്​ രീതികളിലൂടെയുമുള്ള പണമിടപാട്​ ജൂണിൽ 331.6 ദശലക്ഷം ദിനാറായി ഉയർന്നു. 65.2 ശതമാനം വളർച്ചയാണ്​ ഇക്കാര്യത്തിലുണ്ടായത്​. കോവിഡ്​ കാലത്ത്​ ജനങ്ങളിലുണ്ടായ മാറ്റമാണ്​ പുതിയ കണക്കുകളിൽ പ്രതിഫലിക്കുന്നത്​. ഡിജിറ്റൽ ഇടപാടുകളിലേക്ക്​ ആളുകൾ വൻതോതിൽ തിരിയാൻ തുടങ്ങിയത്​ കോവിഡ്​ കാലത്താണ്​.

ഈ പ്രവണത വരും നാളുകളിൽ വർധിക്കുമെന്ന സൂചനയാണ്​ സി.ബി.ബിയുടെ പുതിയ കണക്കുകൾ പറയുന്നത്​. ഏറ്റവും കൂടുതൽ ഡിജിറ്റൽ ഇടപാടുകൾ നടന്നത്​ റസ്റ്റാറന്‍റ്​, സൂപ്പർമാർക്കറ്റ്​, സർക്കാർ സേവനങ്ങൾ, ആരോഗ്യം, വസ്ത്രം-പാദരക്ഷ എന്നീ മേഖലകളിലാണ്​. ഏറ്റവും കൂടുതൽ തുകയുടെ ഇടപാടുകൾ നടന്നത്​ സർക്കാർ സേവനങ്ങൾ, റസ്റ്റാറന്‍റ്​, സൂപ്പർമാർക്കറ്റ്​, വസ്ത്രം-പാദരക്ഷകൾ, വാഹനങ്ങൾ എന്നീ ​മേഖലകളിലാണ്​. രാജ്യത്ത്​ ഇലക്​ട്രോണിക്​ ഫണ്ട്​ ട്രാൻസ്ഫറിലും വർധന രേഖപ്പെടുത്തി​. കഴിഞ്ഞ 16 മാസമായി തുടരുന്ന പ്രവണത ജൂണിലും ആവർത്തിച്ചതായി റിപ്പോർട്ട്​ ചൂണ്ടിക്കാട്ടുന്നു​.

ഫണ്ട്​ കൈമാറ്റം ഏറക്കുറെ തത്സമയംതന്നെ സാധ്യമാക്കുന്ന ഫൗരി + വഴിയാണ്​ കഴിഞ്ഞ മാസം 91.5 ശതമാനം ഇലക്​ട്രോണിക്​ ഫണ്ട്​ ട്രാൻസ്ഫറും നടന്നത്​. പ്രതിദിനം 1000 ദിനാറാണ്​ ഫൗരി + വഴി അയക്കാൻ സാധിക്കുക. 30 സെക്കൻഡിനുള്ളിൽതന്നെ ഇടപാട്​ പൂർത്തിയാകുമെന്നതാണ്​ ഇതിന്റെ പ്രത്യേകത.