യമന്‍ പ്രധാനമന്ത്രി ബഹ്​റൈനിൽ; നേതൃത്വവുമായി ചർച്ച നടത്തി 

മനാമ: സന്ദര്‍ശനത്തിനായി  രാജ്യത്തെത്തിയ യമന്‍ പ്രധാനമന്ത്രി ഡോ. അഹ്​മദ് ഉബൈദ് ബിന്‍ ദഗര്‍ ബഹ്‌റൈന്‍ രാജാവ്​ ഹമദ്​ ബിൻ ഇൗസ ആൽ ഖലീഫ, പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ ഖലീഫ എന്നിവരുമായി കൂടിക്കാഴ്ച നടത്തി. ഇരു രാജ്യങ്ങള്‍ക്കുമിടയില്‍ നിലനില്‍ക്കുന്ന നയതന്ത്ര^സൗഹൃദ ബന്ധം കൂടുതല്‍ ശക്തിപ്പെടുത്തേണ്ടതി​​െൻറ പ്രധാന്യം രാജാവും പ്രധാനമന്ത്രിയും പങ്കുവെച്ചു. സാഖിർ പാലസിലാണ്​ ഹമദ്​ രാജാവുമായുള്ള കൂടിക്കാഴ്​ച നടന്നത്​. സന്നിഗ്ധമായ  ഘട്ടത്തിലൂടെയാണ് യമന്‍ കടന്നുപോകുന്നതെന്നും ഈ സാഹചര്യത്തില്‍ അവിടെ ഭരണസ്​ഥിരത ഉറപ്പാക്കേണ്ടത്​ അനിവാര്യമാണെന്നും പ്രിന്‍സ് ഖലീഫ ബിൻ സൽമാൻ ആൽ ഖലീഫ അഭിപ്രായപ്പെട്ടു. അറബ് രാജ്യങ്ങള്‍ക്കിടയില്‍ യമന് തന്ത്രപ്രധാനമായ സ്ഥാനമുണ്ട്. 
രാജ്യത്ത് സമാധാനവും സ്ഥിരതയും തിരിച്ചുകൊണ്ടുവരാനുള്ള എല്ലാ ശ്രമങ്ങള്‍ക്കും ബഹ്‌റൈ​​െൻറ പിന്തുണയുണ്ടായിരിക്കുമെന്ന്​ രാജാവും പ്രധാനമന്ത്രിയും അറിയിച്ചു. 

മേഖലയില്‍ ഉള്‍ക്കാഴ്ചയുള്ള ഭരണ നേതൃത്വത്താൽ അനുഗ്രഹിക്കപ്പെട്ട രാജ്യമാണ് ബഹ്‌റൈനെന്ന് യമന്‍ പ്രധാനമന്ത്രി അഭിപ്രായപ്പെട്ടു. രാജ്യം അഭിമുഖീകരിക്കുന്ന പ്രതിസന്ധിയുടെ ഘട്ടത്തില്‍ കൂടെ നില്‍ക്കുകയും സമാധാന ശ്രമങ്ങള്‍ക്ക് പിന്തുണ നല്‍കുകയും ചെയ്യുന്ന ബഹ്‌റൈന്​ യമന്‍ പ്രധാനമന്ത്രി നന്ദി പറഞ്ഞു.സൗദിയുടെ നേതൃത്വത്തിലുള്ള അറബ്​ സഖ്യസേനയിൽ ബഹ്​റൈൻ പങ്കാളിയാകുന്നത്​ അറബ്​ ​െഎക്യം മുൻനിർത്തിയാണെന്ന്​ പ്രിൻസ്​ ഖലീഫ ബിൻ സൽമാൻ ആൽ ഖലീഫ വ്യക്തമാക്കി. മേഖലയുടെ സുരക്ഷയും സ്​ഥിരതയും തകർക്കാനുള്ള എല്ലാ ശ്രമങ്ങളെയും സംയുക്തമായി നേരിടേണ്ടതുണ്ട്​. അതുകൊണ്ട്​ യമനെ ലക്ഷ്യമിട്ടുള്ള യാതൊരുവൈദേശിക ഇടപെടലും അനുവദിക്കാനാകില്ല. മേഖലയെ ലക്ഷ്യമിട്ട്​ വലിയ ഗൂഢാലോചനകളാണ്​ നടക്കുന്നതെന്ന്​ ഇരുവരും വിലയിരുത്തി. യമൻ വിഷയത്തിൽ ഇടപെടാനുള്ള സൗദിയുടെ തീരുമാനം നിർണായകമായെന്നും അവർ പറഞ്ഞു. യമനിലെ പുതിയ രാഷ്​ട്രീയ സംഭവവികാസങ്ങൾ പ്രധാനമന്ത്രി ഡോ.ബിൻ ദാഗർ വിവരിച്ചു. ബഹ്​റൈൻ നേതൃത്വത്തിനുള്ള യമൻ പ്രസിഡൻറി​​െൻറ ആശംസകൾ അദ്ദേഹം കൈമാറി.