സംഘർഷമല്ല സഹവർത്തിത്വമാണ് വേണ്ടത് – മാർ കുറിലോസ്‌ മെത്രാപ്പോലീത്ത

മനാമ: മതസമൂഹങ്ങൾക്കിടയിൽ സംഘർഷങ്ങൾക്ക് പകരം സഹവർത്തിത്വമാണ് വേണ്ടതെന്ന് മലങ്കര ഓർത്തഡോക്​സ്​ സഭയുടെ മുംബൈ ഭദ്രാസനാധിപൻ ഗീവർഗീസ്‌ മാർ കുറിലോസ്‌ മെത്രാപ്പോലീത്ത അഭിപ്രായപ്പെട്ടു.

ഹ്രസ്വ സന്ദർശനാർഥം ബഹ്‌റൈനിലെത്തിയ അദ്ദേഹം ഫ്രൻഡ്​സ് സോഷ്യൽ അസോസിയേഷൻ ഭാരവാഹികളോട് സംസാരിക്കവെയാണ് ത​​െൻറ നിലപാട് വ്യക്തമാക്കിയത്. കേരളത്തിൽ അടുത്തിടെയുണ്ടായ ചില പരാമർശങ്ങൾ സമൂഹത്തിനിടയിൽ വലിയ പ്രയാസങ്ങൾ ഉണ്ടാക്കിയിട്ടുണ്ട്.

മറ്റുള്ളവരുടെ മതവികാരത്തെ വ്രണപ്പെടുത്തുന്ന പ്രസ്​താവനകൾ ഒരിക്കലും ആരുടെ ഭാഗത്തുനിന്നും ഉണ്ടാവാൻ പാടില്ലാത്തതാണ്.

അത് നേതൃത്വത്തിലിരിക്കുന്നവരുടെ ഭാഗത്തുനിന്നുണ്ടാവുമ്പോൾ കൂടുതൽ പ്രത്യാഘാതങ്ങൾ ഉണ്ടാക്കാൻ സാധ്യതയുണ്ടെന്ന്​ അദ്ദേഹം പറഞ്ഞു.

ബഹ്‌റൈനിൽ ഫ്രൻഡ്​സ് അസോസിയേഷൻ നടത്തിക്കൊണ്ടിരിക്കുന്ന ജീവകാരുണ്യപ്രവർത്തനങ്ങളെ കുറിച്ച് അദ്ദേഹം ചോദിച്ചറിയുകയും അവ കൂടുതൽ വിപുലപ്പെടുത്താൻ സാധിക്കട്ടെയെന്ന് ആശംസിക്കുകയും ചെയ്‌തു.

മാനവികതയും സാഹോദര്യവും ഊട്ടിയുറപ്പിക്കാനുതകുന്ന വിവിധ പരിപാടികൾ അസോസിയേഷൻ സംഘടിപ്പിക്കാറുണ്ടെന്നും അതി​െൻറ ഭാഗമായി സമൂഹത്തിലെ വിവിധ സമൂഹങ്ങളുമായി ആശയസംവാദങ്ങൾ സംഘടിപ്പിക്കാറുണ്ടെന്നും ഫ്രൻഡ്​സ് ഭാരവാഹികൾ പറഞ്ഞു. വിശ്വമാനവികതയിലൂന്നിയുള്ള സാമൂഹിക പ്രവർത്തനങ്ങൾക്കായി എല്ലാവരും മുന്നിട്ടിറങ്ങണമെന്ന സന്ദേശമാണ് കൂടിക്കാഴ്ചയിലൂടെ സാധ്യമായത്.

പ്രസിഡൻറ്​ ജമാൽ ഇരിങ്ങൽ, വൈസ് പ്രസിഡൻറ്​ സഈദ് റമദാൻ നദ്‌വി, കേന്ദ്ര സമിതിയംഗം നൗമൽ, ഗഫൂർ മൂക്കുതല, ഫസലുറഹ്മാൻ പൊന്നാനി, ബഹ്​റൈൻ സെൻറ് മേരീസ് ഇന്ത്യൻ ഓർത്തഡോക്​സ്​ കത്തീഡ്രൽ വികാരി ഫാ. ബിജു ഫിലിപ്പോസ് എന്നിവരും കൂടിക്കാഴ്ചയിൽ സന്നിഹിതരായിരുന്നു.