ഇഷ്​ട നമ്പറുകള്‍ക്ക് ലേലം വരുന്നു

മനാമ: വാഹനങ്ങൾക്ക് ഇഷ്ട നമ്പറുകള്‍ ലേലം വഴി സ്വന്തമാക്കാൻ വഴിയൊരുങ്ങുന്നു. ഇതിനുള്ള നടപടികള്‍ പുരോഗമിക്കുന്നതായി ആഭ്യന്തര മന്ത്രാലയ അണ്ടര്‍ സെക്രട്ടറി ശൈഖ് നാസിര്‍ ബിന്‍ അബ്ദുഹ്മാന്‍ ആല്‍ഖലീഫ വ്യക്തമാക്കി. ആഭ്യന്തര മന്ത്രി ലഫ്. ജനറല്‍ ശൈഖ് റാഷിദ് ബിന്‍ അബ്ദുല്ല ആല്‍ലഖീഫയുടെ നിര്‍ദേശമനുസരിച്ചാണ് ഇതിൽ തീരുമാനമെടുത്തതെന്ന് അദ്ദേഹം പറഞ്ഞു.

സുതാര്യമായ നടപടി ക്രമങ്ങളാണ് ഇഷ്ട നമ്പറുകള്‍ ലഭിക്കുന്നതിനായുള്ള ലേലത്തിന് ഏര്‍പ്പെടുത്തിയിട്ടുള്ളത്. നമ്പറുകള്‍ പ്രഖ്യാപിക്കുകയും പിന്നീട് ലേലം നടത്തുകയും ചെയ്യുന്ന രീതിയാണ് സ്വീകരിക്കുന്നത്. ഇതിനായി സര്‍ക്കാര്‍ അധീനതയിലുള്ള കമ്പനിയെ ചുമതലപ്പെടുത്തും. വരുമാനം ധന മന്ത്രാലയത്തിലേക്ക് മാറ്റും. ലേലത്തില്‍ താല്‍പര്യമുള്ള ആര്‍ക്കും പങ്കെടുക്കാവുന്നതാണെന്നും ഇത് സംബന്ധിച്ചുള്ള അറിയിപ്പ് വൈകാതെ പുറപ്പെടുവിക്കുമെന്നും അദ്ദേഹം കൂട്ടിച്ചേര്‍ത്തു.