ട്രാഫിക് സുരക്ഷ ഉറപ്പാക്കാന്‍ ഇലക്ട്രോണിക് സൂചനാ ബോര്‍ഡുകള്‍ സ്ഥാപിക്കും 

മനാമ: ട്രാഫിക് സുരക്ഷ ഉറപ്പാക്കാന്‍ ഇലക്ട്രോണിക് സൂചന ബോര്‍ഡുകള്‍ സ്ഥാപിക്കാന്‍ തീരുമാനിച്ചു. കഴിഞ്ഞ ദിവസം ആഭ്യന്തര മന്ത്രി ലഫ്. ജനറല്‍ ശൈഖ് റാഷിദ് ബിന്‍ അബ്​ദുല്ല ആല്‍ ഖലീഫയുടെ അധ്യക്ഷതയില്‍ ചേര്‍ന്ന ട്രാഫിക് സമിതി യോഗത്തിലാണ് തീരുമാനം. റോഡ് ഉപയോഗിക്കുന്ന മുഴുവന്‍ പേര്‍ക്കും സുരക്ഷ ഉറപ്പാക്കാനാവശ്യമായ നടപടികള്‍ സ്വീകരിക്കുന്നതിനുള്ള നിര്‍ദേശങ്ങള്‍ യോഗത്തിലുയര്‍ന്നു. റോഡ്​ സുരക്ഷയെ പ്രോത്സാഹിപ്പിക്കുന്നതിനുള്ള ശ്രമങ്ങൾ തുടരുമെന്ന്​ ആഭ്യന്തര മന്ത്രി യോഗത്തിൽ വ്യക്തമാക്കി. വിദ്യാഭ്യാസ മന്ത്രി ഡോ. മാജിദ് ബിന്‍ അലി അന്നുഐമി, പൊതുമരാമത്ത്-മുനിസിപ്പല്‍-നഗരാസൂത്രണ കാര്യ മന്ത്രി ഇസാം ബിന്‍ അബ്ദുല്ല ഖലഫ്, ഗതാഗത-ടെലികോം മന്ത്രി കമാല്‍ ബിന്‍ അഹ്മദ് മുഹമ്മദ്, നഗരാസൂത്രണ, വികസന കാര്യ ജനറല്‍ അതോറിറ്റി ചെയര്‍മാന്‍ ശൈഖ് നായിഫ് ബിന്‍ ഖാലിദ് ആല്‍ ഖലീഫ എന്നിവര്‍ യോഗത്തില്‍ സന്നിഹിതരായിരുന്നു.

ഇൗ അക്കാദമിക്​ വർഷത്തിൽ  വിദ്യാർത്ഥികളുടെ സുരക്ഷക്കുവേണ്ടി മുന്നിട്ടിറങ്ങിയതിന്​ ജനറൽ ഡയറക്​ടറേറ്റ് ഓഫ് ട്രാഫിക്, കമ്യൂണിറ്റി പോലീസ്​ എന്നിവർ വഹിച്ച പങ്കിനെ വിദ്യാഭ്യാസ മന്ത്രി അഭിനന്ദിച്ചു. അതിനു ശേഷം യോഗം വിവിധ  വിഷയങ്ങൾ ചർച്ച ചെയ്​തു. അനധികൃത കുടിയേറ്റക്കാർക്കും അനധികൃത  ടാക്​സി ഡ്രൈവർമാർക്കും എതിരെ പരിശോധന വേണമെന്ന ആവശ്യവും യോഗത്തിലുയർന്നു. മെട്രോ റെയിലുമായി ബന്ധപ്പെട്ട പഠനം ഗതാഗത മന്ത്രി അവതരിപ്പിച്ചു. ട്രാഫിക് സുരക്ഷ ശക്തിപ്പെടുത്തുന്നതിനുള്ള പ്രവര്‍ത്തനങ്ങള്‍ നടപ്പിലാക്കുന്നതിന്‍െറ പുരോഗതിയും യോഗം ചര്‍ച്ച ചെയ്​തു.