തണൽ ഭവന പദ്ധതിയിലെ അഞ്ച്​ വീടുകൾക്ക് തറക്കല്ലിട്ടു

മനാമ: പ്രളയനാന്തരം എറണാകുളം ജില്ലയിലെ ചേരാനെല്ലൂർ ഗ്രാമപഞ്ചായത്തിൽ ഹൈബി ഈഡൻ എം.എൽ.എ നടപ്പിലാക്കുന്ന ചേരാം ചേരാനെല്ലൂരിനൊപ്പം കാമ്പയി​​​െൻറ ഭാഗമായുള്ള തണൽ ഭവന പദ്ധതിയിലെ അഞ്ച്​ വീടുകളുടെ ശിലാസ്ഥാപനം വി.കെ.എൽ ഗ്രൂപ്പ് ചെയർമാൻ ഡോ.വർഗീസ് കുര്യൻ നിർവ്വഹിച്ചു.
ഇതോടെ തണൽ ഭവന പദ്ധതിയിൽ 24 വീടുകൾക്ക് തറക്കല്ലിട്ടു .

ബഹ്‌റൈൻ ആസ്ഥാനമായുള്ള വി.കെ.എൽ ഗ്രൂപ്പാണ് അഞ്ച്​ വീടുകളുടെയും സ്പോൺസർ. ചേരാനെല്ലൂർ ഗ്രാമപഞ്ചായത്ത് 15 ാം വാർഡിൽ മാട്ടുമ്മൽ റോഡിൽ നെൽകുന്നശ്ശേരി ജോസഫി​​​െൻറ വീടിന് തറക്കല്ലിട്ടാണ് പദ്ധതി ആരംഭിച്ചത്. ഹൈബി ഈഡൻ എം.എൽ.എ അധ്യക്ഷത വഹിച്ച ചടങ്ങിൽ ഇടപ്പള്ളി ബ്ലോക്ക് പഞ്ചായത്ത് പ്രസിഡൻറ്​ എം.ആർ ആൻറണി ,ചേരാനല്ലൂർ ഗ്രാമ പഞ്ചായത്ത് പ്രസിഡൻറ്​ സോണി ചീക്കു ,വൈസ് പ്രസിഡന്റ് സികെ രാജു, വാർഡ് അംഗം കെ.ടി. സംഗീത തുടങ്ങിയവർ പങ്കെടുത്തു.