ആത്​മഹത്യകൾ ബോധവത്​കരണം വേണമെന്ന്​ തൊഴിലാളി ക്ഷേമ സമ്മേളനത്തിൽ പരാമർ​ശം

മനാമ: ബഹ്​റൈനിലെ ഇന്ത്യൻ പ്രവാസി സമൂഹത്തിൽനിന്ന്​ തുടർച്ചയായ ആത്​മഹത്യ വാർത്തകൾ ഉണ്ടാകുന്നതിനെ കുറിച്ച്​ ​ ഇൻറർനാഷണൽ ലേബർ ഒാർഗനൈസേഷൻ ബഹ്​റൈൻ ചേംബർ ഒാഫ്​ കൊമേഴ്​സ്​ ആൻറ്​ ഇൻഡസ്​ട്രി സഹകരണത്തോടെ സംഘടിപ്പിച്ച പ്രത്യേക സമ്മേളനത്തിൽ പരാമർശം.
നിർമ്മാണ ​മേഖലയിലെ തൊഴിലാളി ക്ഷേമത്തിൽ പരിശീലനം എന്ന പ്രമേയത്തിൽ കഴിഞ്ഞ ദിവസം മുതൽ ആരംഭിച്ച ത്രിദ്വിന സമ്മേളനത്തിൽ സംബന്​ധിച്ച അൽ നമൽ ​ഗ്രൂപ്പ്​ എച്ച്​.ആർ ഒാഫീസർ സുനിൽ സി തോമസ്​ ആണ്​ ഇൗ വിഷയം ഉന്നയിച്ചത്​. ഇൗ വർഷത്തിൽ ഇതുവരെ 27 ഇന്ത്യൻ പ്രവാസികളാണ്​ ജീവനൊടുക്കിയത്​.

കഴിഞ്ഞ ഒരുമാസത്തിനുള്ളിൽ അഞ്ച്​​ മലയാളികൾ ഉൾപ്പെടെ ആത്​മഹത്യ ചെയ്​തു. സമ്മേളനത്തിൽ സുനിൽ ഇൗ വിഷയം ചൂണ്ടിക്കാട്ടിയപ്പോൾ വേദിയിലുള്ള ഇൻറർനാഷണൽ ലേബർ ഒാർഗനൈസേഷൻ നേതൃത്വത്തിലുള്ളവർ വളരെ ഗൗരവത്തോടെ കാണേണ്ടതാണിതെന്നും പ്രത്യേകമായി ചർച്ചയും പരിഹാര നിർദേശങ്ങളും ഇതിനായി ഉണ്ടാകണമെന്നും അഭിപ്രായപ്പെട്ടു. തൊഴിലാളികൾക്കിടയിൽ ബോധവത്​കരണം നടത്തണമെന്നും മാനസിക പിരിമുറുക്കമുള്ളവർക്ക്​ കൗൺസിലിങ്​ നൽകണമെന്ന അഭിപ്രായങ്ങളും ഉയർന്നു. സമ്മേളനത്തി​​​െൻറ സമാപന ദിവസമായ ഇന്ന്​ വിവിധ വിഷയങ്ങളിൽ ചർച്ചയും വിശകലനവും ഉണ്ടാകുമെന്നും ബന്​ധപ്പെട്ടവർ അറിയിച്ചിട്ടുണ്ട്​.

സമ്മേളനത്തി​​​െൻറ ഭാഗമായി തൊഴിലാളി ക്ഷേമത്തിനുള്ള ആ മുഖം, പ്രശ്​നങ്ങളെ മനസിലാക്കൽ, എന്താണ്​ തൊഴിലാളി ക്ഷേമം എന്തുകൊണ്ടാണ്​ അവ നിർമ്മാണ വ്യവസായ മേഖലയിൽ പ്രധാനമായിരിക്കുന്നത്​, തൊഴിലാളികളുടെ ക്ഷേമം എങ്ങനെയാണ്​ കോർപ്പറേറ്റ് സാമൂഹിക ഉത്തരവാദിത്തവും അതിനൊപ്പം ഉത്തരവാദിത്തമുള്ള വ്യാപാര പ്രവൃത്തിയായി മാറുന്നത്​ എന്നിങ്ങനെയുള്ള വിഷയങ്ങൾ സമ്മേളനത്തിൽ ഇൻറർനാഷണൽ ലേബർ ഒാർഗനൈസേഷൻ പ്രതിനിധി സോഫിയ കഖാൻ അവതരിപ്പിച്ചു. ഇൻറർനാഷണൽ ലേബർ ഒാർഗനൈസേഷൻ പ്രതിനിധി ലാമ ക്വയ്​ജാൻ, ബി.സി.സി.​െഎ പ്രതിനിധി ഡോ.മനാഫ്​ ഹംസാഹ്​ എന്നിവർ സമ്മേളനത്തി​​​െൻറ ആമുഖപ്രഭാഷണം നടത്തി. ഇൗ രംഗത്തെ വിദഗ്​ധനും ഗവേഷകന​ുമായ മുസ്​തഫ ഖദ്​രി, ജെയിംസ്​ ലെവ്​രി, ജെസിക്ക വെർഡൻ എന്നിവർ സംസാരിച്ചു. ഇന്ന്​ നടക്കുന്ന വിവിധ സെഷനുകളിൽ മുഹമ്മദ്​ ഖെയിർ, ബഹ്​റൈൻ ഹെൽത്​ ആൻറ്​ സേഫ്​ടി സൊസൈറ്റി പ്രതിനിധി ഡോ.മഹ ഷഹാബ്​ തുടങ്ങിയവർ സംസാരിക്കും.

ഇന്ത്യൻ പ്രവാസികൾക്കിടയിൽ ഹൃദയാഘാത മരണം തുടർച്ചയായി മാറിയതും സമ്മേളനത്തി​​​െൻറ ​ ശ്രദ്ധയിൽപ്പെടുത്തുമെന്ന്​ സമ്മേളന പ്രതിനിധി സുനിൽ സി തോമസ്​ ‘ഗൾഫ്​ മാധ്യമ’​ത്തോട്​ പറഞ്ഞു. കുടുംബം ഒപ്പമില്ലാതെ കഴിയുന്ന പ്രവാസികൾക്കിടയിലാണ്​ ഹൃദയാഘാത മരണം വ്യാപകമാകുന്നത്​ എന്ന നിരീക്ഷണവും ഇതിനൊപ്പം അവതരിപ്പിക്കുമെന്നും അദ്ദേഹം പറഞ്ഞു.