സൗദി-ബഹ്​റൈൻ ആരോഗ്യ മന്ത്രിമാർ കൂടിക്കാഴ്​ച നടത്തി

മനാമ: സൗദി ആരോഗ്യ മന്ത്രി ഡോ. തൗഫീഖ് ഫൗസാന്‍ അല്‍റബീഅയുടെ നേതൃത്വത്തിലുള്ള പ്രതിനിധി സംഘവുമായി ബഹ്‌റൈന്‍ ആരോഗ്യ മന്ത്രി ഫാഇഖ ബിന്‍ത് സഈദ് അസ്സാലിഹി​​​െൻറ നേതൃത്വത്തില്‍ കൂടിക്കാഴ്​ച നടത്തി. ബഹ്‌റൈനിലെ ആരോഗ്യ സേവനത്തെക്കുറിച്ച് പഠിക്കുന്നതിനും ആരോഗ്യ സേവന മേഖലയില്‍ ഇരുരാജ്യങ്ങളും തമ്മില്‍ സഹകരണം മെച്ചപ്പെടുത്തുന്നതിനുമാണ് സന്ദര്‍ശനം. ബഹ്‌റൈനിലെ ആരോഗ്യ സേവന രീതിയുടെ പരിഷ്‌കരണം, ആരോഗ്യ ഇന്‍ഷുറന്‍സ് പദ്ധതി എന്നിവയെക്കുറിച്ച് മന്ത്രി വിശദീകരിക്കുകയും സൗദി സംഘം സംതൃപ്തി രേഖപ്പെടുത്തുകയും ചെയ്തു. ലഫ്. ജനറല്‍ ശൈഖ് ഡോ. മുഹമ്മദ് ബിന്‍ അബ്​ദുല്ല ആല്‍ഖലീഫയുടെ നേതൃത്വത്തിലുള്ള ആരോഗ്യ കാര്യ സുപ്രീം കൗണ്‍സിലി​​​െൻറ പ്രവര്‍ത്തനങ്ങളെക്കുറിച്ചും മന്ത്രി വിശദീകരിച്ചു. പ്രാഥമികാരോഗ്യ മേഖലയില്‍ ബഹ്‌റൈന്‍ കൈവരിച്ച നേട്ടം അന്താരാഷ്​ട്ര തലത്തില്‍ പ്രശംസക്ക് പാത്രമായതായും അവര്‍ ചൂണ്ടിക്കാട്ടി. ബഹ്‌റൈനും സൗദിയും തമ്മില്‍ ആരോഗ്യ സേവന മേഖലയില്‍ സഹകരിക്കുന്നതിനുള്ള ചര്‍ച്ചകളും നടന്നു. കൂടിക്കാ​ഴ്​ചയിൽ ആരോഗ്യ മന്ത്രാലയ അണ്ടര്‍ സെക്രട്ടറി ഡോ. വലീദ് അല്‍മാനിഉം സന്നിഹിതനായിരുന്നു.