എല്ലാ പ്രവാസി തൊഴിലാളികളുടെയും ശമ്പളം ബാങ്ക്​ വഴിയാക്കാൻ നീക്കം

മനാമ: ബഹ്​റൈനിൽ ജോലി ചെയ്യുന്ന എല്ലാ പ്രവാസിക ളുടെയും ശമ്പളം ഇവിടുത്തെ ബാങ്കുകൾ വഴി നൽകണമെന്ന നിയമം ഉടൻ നടപ്പാക്കുമെന്ന്​ റിപ്പോർട്ട്​. പുതിയ ​വേതന സംരക്ഷണ സംവിധാനം അടുത്ത വർഷം ജനുവരി മുതൽ നടപ്പാക്കാനാണ്​ ഉദ്ദേശിക്കുന്നത്. വിദേശ തൊഴിലാളികളുടെ അവകാശങ്ങൾ സംരക്ഷിക്കുക എന്നതാണ്​ ഇതി​​െൻറ ലക്ഷ്യം. താഴ്​ന്ന വരുമാനക്കാർക്കും വീട്ടുജോലിക്കാർക്കും മറ്റും ഇൗ നിയമം നടപ്പാക്കുന്നത്​ വലിയ തോതിൽ ഗുണം ചെയ്യും. ശമ്പള സ്ലിപ്​ പോലുമി​ല്ലാതെയാണ്​ ഇൗ വിഭാഗങ്ങളിൽ പെടുന്ന പലർക്കും വേതനം നൽകുന്നത്​. ഇത്​ കടുത്ത ചൂഷണത്തിനും ശമ്പളം തന്നെ നിഷേധിക്കുന്നതിനും ഇടയായിട്ടുണ്ട്​. പദ്ധതി നടപ്പാക്കുന്നതിന്​ മുമ്പായി സെൻട്രൽ ബാങ്ക്​ ഒാഫ്​ ബഹ്​റൈൻ (സി.ബി.ബി) വിവിധ ബാങ്കുകളുടെ ചീഫ്​ എക്​സിക്യൂട്ടിവുമാർക്ക്​ അവരുടെ അഭിപ്രായം തേടി കത്തയച്ചിട്ടുണ്ട്​. ശമ്പളം കൈപ്പറ്റൽ, നൽകൽ തുടങ്ങിയ കാര്യങ്ങളിൽ സുവ്യക്തമായ നിർദേശങ്ങൾ സമർപ്പിക്കാനാണ്​ സി.ബി.ബി ആവശ്യപ്പെട്ടിരിക്കുന്നത്​. ഇൗ വിഷയത്തിൽ തുറന്ന ചർച്ചക്ക്​ തയാറാ​െണന്ന്​ സി.ബി.ബി വ്യക്തമാക്കിയതായി പ്രാദേശിക പത്രം   റിപ്പോർട്ട്​ ചെയ്​തു.

തൊഴിലാളികൾക്ക്​ പ്രീപെയ്​ഡ്​ കാർഡുകൾ വഴി​യും ഇ^വാലറ്റുകൾ വഴിയും മറ്റു മാർഗങ്ങൾ മുഖേനയും ശമ്പളം നൽകുന്ന കാര്യവും പഠനവിധേയമാക്കും. പുതിയ തീരുമാനം തൊഴിലാളികൾക്ക്​ അധികഭാരമായി തീരാൻ ഇടവരരുത് എന്ന്​ നിർദേശമുണ്ട്​. തൊഴിലുടമകൾക്ക്​ അധികം ചെലവില്ലാതെ ഇത്​ നടപ്പാക്കാനും സാധിക്കണമെന്ന്​ സി.ബി.ബി വ്യക്തമാക്കുന്നു.പുതിയ നിർദേശം ഇക്കണോമിക്​ ഡെവലപ്​മ​െൻറ്​ ബോർഡ്​, ലേബർ മാർക്കറ്റ്​ റെഗുലേറ്റി   അതോറിറ്റി (എൽ.എം. ആർ.എ) തുടങ്ങിയ ഏജൻസികളും പഠിക്കും. പദ്ധതി നടപ്പാക്കാനായി സി.ബി.ബിയും മറ്റ്​ ഏജൻസികളുമായി ചേർന്ന്​ പ്രവർത്തിക്കുകയാണെന്ന്​ എൽ.എം.ആർ.എ ചീഫ്​ എക്​സിക്യൂട്ടിവ്​ ഉസാമ അൽ അബ്​സി പറഞ്ഞു. നിലവിൽ ഏതൊക്കെ ബാങ്കുകളാണ്​ ഇൗ സേവനം നൽകാൻ സന്നദ്ധരായിട്ടുള്ളത്​ എന്ന കാര്യമാണ്​ പഠിക്കുന്നത്​. തൊഴിലാളികളുടെ ചൂഷണം അവസാനിപ്പിക്കാൻ ഇൗ നടപടി കരുത്ത്​ പകരുമെന്ന്​ അൽ അബ്​സി അഭിപ്രായപ്പെട്ടു. ഇത്​ വിവിധ ഘട്ടങ്ങളിലായാണ്​ നടപ്പാക്കുകയെന്നും അദ്ദേഹം കൂട്ടിച്ചേർത്തു. വേതന സംരക്ഷണ സംവിധാനം കുവൈത്ത്​ കഴിഞ്ഞ വർഷം നടപ്പാക്കിയിട്ടുണ്ട്​. ഇത്​ പ്രകാരം പ്രവാസികൾ തൊഴിലെടുക്കുന്ന കമ്പനികൾ അവരുടെ ശമ്പളം ബാങ്ക്​ എക്കൗണ്ടിലേക്ക്​ മാറ്റണം. ശമ്പളം മുടങ്ങിയാൽ ഭാവിയിൽ വിസ പെർമിറ്റ്​ അനുവദിക്കാത്ത സ്​ഥിതിയുണ്ടാകും.   ശമ്പളം ലഭിക്കുന്നില്ല എന്നത്​ താഴ്​ന്ന വരുമാനക്കാരായ പ്രവാസികൾക്കിടയിലുള്ള പ്രധാന പരാതികളിലൊന്നാണ്​. പല നിർമാണ സ്​ഥാപനങ്ങൾക്കെതിരെയും ഇത്തരം പരാതികൾ ഉയർന്നിട്ടുണ്ട്​. ഇൗ വർഷം രണ്ടാം പാദത്തിലെ കണക്കനുസരിച്ച്​ ബഹ്​റൈനിൽ  606,357 പ്രവാസികൾ ജോലി ചെയ്യുന്നുണ്ട്​. ഇതിൽ 100,058 പേർ വീട്ടുജോലിക്കാരാണ്​.