ബഹ്​റൈനിൽ റസ്​റ്റോറൻറുകൾ പൂർണ്ണമായി തുറക്കുന്നത്​ ഘട്ടം ഘട്ടമായി

മനാമ: കോവിഡ്​ വ്യാപനം തടയുന്നതിന്​ ഏർപ്പെടുത്തിയ നിയന്ത്രണങ്ങളിൽ കൂടുതൽ ഇളവുകൾ അനുവദിക്കാൻ തീരുമാനം. നാഷണൽ ​മെഡിക്കൽ ടാസ്​ക്​ ഫോഴ്​സി​​െൻറ ശിപാർശയനുസരിച്ച്​ കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിൻസ്​ സൽമാൻ ബിൻ ഹമദ്​ ആൽ ഖലീഫയുടെ അധ്യക്ഷതയിൽ ചേർന്ന ഗവൺമ​െൻറ്​ എക്​സിക്യൂട്ടീവ്​ കമ്മിറ്റിയാണ്​ തീരുമാനങ്ങൾ എടുത്തത്​. 

ഘട്ടം ഘട്ടമായിട്ടായിരിക്കും വിവിധ സ്​ഥാപനങ്ങൾ തുറക്കുക. ആഗസ്​റ്റ്​ ആറിന്​ തുടങ്ങുന്ന ആദ്യ ഘട്ടത്തിൽ ജിംനേഷ്യങ്ങളും മൈതാനങ്ങളും സ്​പോർട്​സ്​ ഹാളുകളും നീന്തൽക്കുളങ്ങളും തുറക്കും. രണ്ടാം ഘട്ടം സെപ്​റ്റംബർ മൂന്നിനാണ്​ തുടങ്ങുന്നത്​. റസ്​റ്റോറൻറുകളിലും കഫേകളിലും പുറത്തിരുന്ന്​ ഭക്ഷണം കഴിക്കുന്നത്​ അന്ന്​ മുതൽ അനുവദിക്കും. 

ട്രെയിനിങ്​ ഇൻസ്​റ്റിറ്റ്യൂട്ടുകളും തുറക്കും. സെപ്​റ്റംബർ 24ന്​ തുടങ്ങുന്ന നാലാം ഘട്ടത്തിൽ റസ്​റ്റോറൻറുകളിലും കഫേകളിലും അകത്തിരുന്ന്​ ഭക്ഷണം കഴിക്കാൻ അനുവദിക്കും. ഫോർ സ്​റ്റാർ, ഫൈവ്​ സ്​റ്റാർ ഹോട്ടലുകളിലെ റസ്​റ്റോറൻറുകളും ബഹ്​റൈൻ ടൂറിസം ആൻറ്​ എക്​സിബിഷൻസ്​ അതോറിറ്റിയുടെ അംഗീകാരമുള്ള ടൂറിസ്​റ്റ്​ കേന്ദ്രങ്ങളിലെ റസ്​റ്റോറൻറുകളും ക്രമേണ തുറക്കാൻ അനുമതി നൽകാനും തീരുമാനിച്ചു. 

മതിയായ മുൻകരുതൽ നടപടികൾ സ്വീകരിച്ചുകൊണ്ടായിരിക്കും ഇവ തുറക്കുന്നത്​. 20 പേരിൽ അധികമാകാത്ത പരിപാടികൾക്ക്​ ബുക്കിങ്​ അനുവദിക്കാം. ഒരു സമയത്ത്​ ഒരു ബുക്കിങ്​ മാത്രമേ ഉണ്ടാകാൻ പാടുള്ളൂ. തുറക്കാൻ അനുമതി നൽകിയ സ്​ഥലങ്ങളിൽ മുൻകരുതൽ നടപടികൾ സ്വീകരിക്കുന്നുണ്ടോയെന്ന്​ തുടർച്ചയായി അവലോകനം ചെയ്യും. 

പ്രതിദിന കോവിഡ്​ പരിശോധനയിൽ കണ്ടെത്തുന്ന രോഗികളുടെ എണ്ണം, തീവ്രപരിചരണം ആവശ്യമായ രോഗികളുടെ എണ്ണം, ചികിത്സാ കേന്ദ്രങ്ങളിലെ സൗകര്യങ്ങൾ എന്നിവ വിലയിരുത്തി തീരുമാനങ്ങൾ പുനഃപരിശോധനക്ക്​ വിധേയമാക്കുകയും ചെയ്യും.