ഒാർക്കുക; പ്രവാസികൾ ശത്രുക്കളല്ല...

മനാമ: കോവിഡ്​ -19 വ്യാപനത്തെത്തുടർന്ന്​ ഏറ്റവുമധികം പ്രതിസന്ധിയിലായ കൂട്ടരാണ്​ പ്രവാസികൾ. നാട്ടിൽ എത്തിയാൽ ഒറ്റപ്പെടുത്തലും ബഹിഷ്​കരണവും അപമാനവുമെല്ലാമാണ്​ ഇവർക്ക്​ നേരിടേണ്ടി വരുന്നത്​. മുമ്പ്​ പ്രവാസികൾ നാട്ടിൽ എത്തിയാൽ ഒാടിയെത്തി സ്​നേഹം പ്രകടിപ്പിച്ചിരുന്നവർ ഇന്ന്​ വീട്ടിൽനിന്ന്​ ഒളിഞ്ഞുനോക്കുന്ന സ്​ഥിതിയാണ്​.

രോഗവ്യാപനം തടയാനുള്ള ഏറ്റവും നല്ല മാർഗം രോഗബാധിത രാജ്യങ്ങളിൽ നിന്നുവരുന്നവർ സ്വയം നിരീക്ഷണത്തിൽ കഴിയുക എന്നതുതന്നെയാണ്​. എന്നാൽ, പെ​െട്ടന്നൊരു ദിവസമുണ്ടാകുന്ന ഇൗ ഒറ്റപ്പെടൽ പലർക്കും ഉൾക്കൊള്ളാനാവുന്നില്ല എന്നതാണ്​ യാഥാർഥ്യം.

വീട്ടുനിരീക്ഷണത്തിൽ കഴിയുന്നതിന്​ ആളുകളെ മാനസികമായി ഒരുക്കുന്നതിന്​ കൂടുതൽ നടപടികൾ ആവശ്യമാണെന്നാണ്​ ഇൗ സംഭവങ്ങൾ തെളിയിക്കുന്നത്​. കഴിഞ്ഞ ദിവസം നാട്ടിലെത്തിയ കോഴിക്കോട്​ സ്വദേശിയായ ഒരു പ്രവാസി നേരിട്ടത്​ ഇത്തരമൊരു അനുഭവമാണ്​. അയൽവാസികൾ ഒന്നും അടുത്തേക്ക്​ എത്തിയില്ല. അയൽ വീട്ടിലെ കുട്ടികൾക്ക്​ നൽകിയ മിഠായികൾ തിരിച്ചുകൊടുത്തു. അദ്ദേഹത്തി​​​​​െൻറ മക്കളുടെ ഒപ്പം കളിച്ചിരുന്നവർ വരാതായി. കോഴി​ക്കോട്ടുകാരനായ മറ്റൊരാൾ നാട്ടിലെത്തിയപ്പോൾ അയൽപക്കത്തെ പ്രായമായ വീട്ടുകാർ താമസം തന്നെ വേറൊരിടത്തേക്ക്​ മാറ്റി.

ബഹ്​റൈനിലെ അറിയപ്പെടുന്ന സാമുഹിക പ്രവർത്തകനായ മലപ്പുറം സ്വദേശി നാട്ടിലെത്തിയപ്പോഴും സമാന അനുഭവമാണുണ്ടായത്​. എന്നും നാട്ടിലെത്തിയാൽ ഒാടിവന്ന്​ കെട്ടിപ്പിടിക്കുന്ന സുഹൃത്ത്​ വിടിന്​ പുറത്തിറങ്ങാൻ തയ്യാറായില്ല. ബഹ്​റൈനിൽ ഒരു കമ്പനിയിൽ ജോലി ചെയ്യുന്ന യുവാവ്​ ബുധനാഴ്​ച നാട്ടിൽനിന്ന്​ തിരിച്ചെത്തിയപ്പോൾ ഉണ്ടായ സംഭവവും സമാനമാണ്​.

നാട്ടിൽനിന്ന്​ രോഗമില്ലെന്ന മെഡിക്കൽ സർട്ടിഫിക്കറ്റ്​ ഇദ്ദേഹത്തിന്​ ലഭിച്ചിരുന്നു. ബഹ്​റൈൻ വിമാനത്താവളത്തിൽ എത്തിയപ്പോൾ 14 ദിവസത്തെ വീട്ടുനിരീക്ഷണത്തിൽ കഴിയണമെന്ന്​ നിർദേശിച്ചു. ഇക്കാര്യം കമ്പനിയിൽ അറിയിച്ചപ്പോൾ നിരീക്ഷണത്തിൽ കഴിഞ്ഞശേഷം ജോലിയിൽ പ്രവേശിച്ചാൽ മതിയെന്ന്​ സമ്മതിച്ചു. ഇതനുസരിച്ച്​ താമസ സ്​ഥലത്തെത്തിയപ്പോൾ മറ്റുള്ളവർ അകത്ത്​ കടക്കാൻ അനുവദിച്ചില്ല.

വിവരമറിഞ്ഞ്​ പ്രവാസി കമീഷൻ അംഗം സുബൈർ കണ്ണൂർ ഇടപെട്ട്​ മറ്റ്​ താമസക്കാരുമായി സംസാരിച്ചെങ്കിലും ആദ്യം വഴങ്ങാൻ തയ്യാറായില്ല. ഒടുവിൽ യുവാവിനെ സൽമാനിയ മെഡിക്കൽ കോംപ്ലക്​സിൽ കൊണ്ടുപോയി പരിശോധന നടത്തി രോഗമില്ലെന്ന്​ ഉറപ്പിച്ചു. വീണ്ടും മറ്റ്​ താമസക്കാരുമായി സംസാരിച്ച്​ കാര്യങ്ങൾ ബോധ്യപ്പെടുത്തി. ഇതിനുശേഷമാണ്​ യുവാവിനെ ഫ്ലാറ്റിൽ താമസിപ്പിക്കാൻ തയ്യാറായത്​.

രണ്ട്​ മുറിയുള്ള ഫ്ലാറ്റിൽ ഒരു മുറിയിലാണ്​ യുവാവ്​ നിരീക്ഷണത്തിൽ കഴിയുന്നത്​. രോഗ സംശയം തോന്നിയാൽ പരിശോധന നടത്തുന്നതിന്​ സൽമാനിയ മെഡിക്കൽ കോംപ്ലക്​സിൽ പ്രത്യേക സംവിധാനം ഒരുക്കിയിട്ടുണ്ട്​. കഴിഞ്ഞ ദിവസം ശ്രീലങ്കൻ എയർവേസിൽ തിരുവനന്തപുരത്തേക്ക്​ പോയ പ്രവാസിക്ക്​ ഫിലിപ്പൈൻസ്​ സ്വദേശിയായ ഭാര്യ കൂടെയുള്ളതിനാൽ യാത്ര മുടങ്ങി. കൊളംബോ വിമാനത്താവളത്തിൽ എത്തിയപ്പോഴാണ്​ ഭാര്യയെ വിമാനത്തിൽ കയറ്റാനാവില്ലെന്ന്​ പറഞ്ഞത്​. മറ്റ്​ രക്ഷയില്ലാതെ അദ്ദേഹം ബഹ്​റൈനിലേക്ക്​ തിരിച്ചുവരാൻ തീര​ുമാനിക്കുകയായിരുന്നു.

Latest Video